用户:Richard923888/DC15工作区/大改善/香港文化-粤

香港文化（粤拼：Hoeng¹ gong² man⁴ faa³）系香港嘅地方文化。香港人嘅祖籍大半都系喺广东或者广西，而嗰一头嘅地方文化－亦即系岭南文化－本嚟就已经因为历史原因同中原地带（北方）嘅文化好唔同。而香港因为身为前英国殖民地嘅历史背景同埋国际贸易港嘅地位，构成咗文化上粤英荟萃。再加埋佢哋同其他亚洲国家嘅交流多，吸咗唔少日本、韩国、同台湾嘅文化。总体嚟讲，佢有一套同中原好唔同嘅特色。

香港坐正咗喺岭南最南端嘅珠江口岸，对住个南中国海，凭住好靓嘅地理位置同埋维多利亚港，发展咗做一个国际贸易同转口港。直至廿一世纪，佢更加系成个亚洲嘅金融服务中心。香港嘅总面积系 1104 平方公里左右，由香港岛、九龙半岛同新界三个区域组成。维多利亚港喺香港岛同九龙半岛中间，而新界就同中国大陆连住。虽然香港畀人嘅印象系好热闹嘅大城市，但系其实佢有成七成嘅面积都系郊野，而且佢周围嘅水域度重有成超过 200 个岛仔－包括香港国际机场。总括嚟讲，香港嘅地形基本上就系一个地少人多嘅商贸都市，所以佢嘅文化就好自然系以海洋文化同商业文化做主导。

香港嘅气候亦都影响到佢嘅文化。佢系属于亚热带气候，四季分明。五至十一月系风季。春天又暖又湿，夜晚嗰阵会凉啲；夏天热辣辣又湿立立，好好太阳，耐唔耐会打风行雷；秋天会有金风送爽，天气好温和，系全年最舒服嘅季节；冬天就好凉爽，间中会有冷锋，但系气温好少可跌到摄氏 5 度以下，基本上唔会落雪。呢种气候同岭南地区好似，所以香港嘅建筑喺好多地方都会好似岭南咁，会用凉爽啲嘅建筑风格，而且因为佢天气系有啲热，香港人都兴饮啲好似凉茶呢类嘅嘢饮嚟降吓温。

点嚟

由百越到汉化

喺上古同中古时期，香港嘅历史文化同岭南其他地方冇乜大分别，都系一个由百越去汉化嘅时期。喺公元前 110 年，控制住成个岭南地区同埋今日越南北半橛嘅古国－南越国－畀汉朝帝国打冧咗，令到包埋香港在内嘅岭南做咗中原皇朝嘅领土。但系嗰时呢头住嘅都重系百越族（粤拼：Bak³ jyut⁶ zuk⁶）。百越族喺文化上未汉化，所以一般都唔会畀人当系汉人。去到 7 至 13 世纪嗰时，岭南畀大唐同大宋断断续续咁统治，再加埋中原畀胡人侵略，有大批汉人由北面走难落嚟岭南度住，先至令到岭南呢头开始汉化。汉化咗之后，岭南文化基本上成咗形，做咗一种同时有唐宋汉文化同百越文化喺入面嘅新文化：好似系广东话咁，佢有些少百越话嘅特征，但系佢总体又好似唐宋汉人讲嘅话。

呢样嘢亦都反映喺血统上面。直至廿一世纪，包埋香港人在内嘅粤人普遍都有齐古汉人同百越人嘅血统^[1]。

元明清统治

响 13 世纪，香港第一次喺历史舞台度有人会提。嗰阵嘅南宋皇朝畀蒙古人打冧咗。据讲南宋最后嘅一个皇帝宋端宗喺南宋亡国嗰场仗之前嚟香港住咗一阵，而呢个就系今日香港嘅地标宋王台（粤拼：Sung³ wong⁴ toi⁴）嘅起源。因为好多人都觉得大宋系最后一个正统嘅中华皇朝^[2]，所以呢个地标好有历史价值。打后嗰一二百年，香港嘅人同其他粤人一样，畀大元帝国分类做南人，而唔系汉人。去到 15 世纪嘅大明统治时期，香港人同其他粤人先至畀人正式咁认同系汉人。嗰时嘅岭南做咗大明对外贸易嘅港口，引到好多西欧人嚟做生意，令到岭南文化多咗啲西欧嘢喺入面，但系嗰阵时香港喺文化上除咗有围头人嘅围头文化之外重系同广州或者佛山呢啲岭南城市冇乜明显嘅分别。要一路去到成 19 世纪，大清将香港割让咗畀大英帝国，先至令到香港人开始咗有自己嘅一套文化同埋身份认同。

英治时期

香港喺英国人统治下好多地方都进步得好快。佢喺经济方面好标青，系嗰时亚洲最有钱嘅地方之一，好多广东广西嘅粤人都因为中原打仗打到七国咁乱走难落咗嚟香港度长住，令到人口升得好犀利。基本上除咗喺畀日军控制住嘅三年零八个月时期，香港成个廿世纪都系飞跃紧嘅状态。喺廿世纪后半橛，香港重学人整流行曲、拍戏、同搞动画，开始有埋文化上嘅影响力。喺打后嘅廿一世纪头，佢人均 GDP 重高过美国。成个过程入面，香港由岭南其他地方嗰度引入咗啲文化，又学咗好多英国嘅文化。除咗咁，日本喺二战投降之后就开始行和平主义搞经济同文化产业，后尾做埋香港最大嘅贸易拍挡之一，对香港有好大嘅文化影响力^[3]。

香港文化嘅主体系岭南文化（粤拼：Ling⁵ naam⁴ man⁴ faa³）同埋英国文化（粤拼：Jing¹ gwok³ man⁴ faa³）。香港人嘅祖籍九成都系喺广东或者广西，所以香港继承咗好多岭南嘅文化：传统嚟讲，香港人讲嘅系岭南嘅广东话，起嘅系岭南建筑，有搞啲岭南工艺，会听啲岭南戏曲，而食嘅嘢又系广东菜多；因为英国人主要系统治，香港学嘅英国文化多数都系制度上嘅嘢：英国话系香港嘅法定语言之一，佢哋啲法官会好似英国嗰啲咁戴假发，佢哋又会好似英国咁喺某啲正式场合度吹苏格兰风笛，而且香港周街都系啲有齐岭南同西欧风味嘅唐楼建筑；喺文化上嚟讲，香港可以话系粤同英荟萃。除咗咁，香港重有少少本土文化－喺粤人大规模移民嚟香港之前，香港已经有围头人同蜑家人呢类嘅本地人。佢哋世世代代都系喺度住嘅。佢哋啲文化－好似系围村盆菜－都有帮手丰富咗现代嘅香港文化。

语文

香港嘅官方语文系“中文”同“英文”。所有官方标志都系用双重文字（繁体中文加英文）写，而大部分嘅铺头同餐馆嘅招牌都会有齐呢两种文字。

中文

响语言上，因为香港人嘅祖籍大半都系喺岭南地区，属于广府民系，所以九成以上嘅香港人日常生活讲嘅都系广东话（粤拼：Gwong² dung¹ waa²）。广东话系一种历史好悠久嘅语言，佢有成过千年历史，保留咗啲百越话嘅特征，但系总体又好近唐朝宋朝汉人讲嘅话－攞嚟读唐诗宋词重会好押韵（胡化咗嘅普通话反而做唔到呢样嘢），而且佢重有自己嘅一套诗。喺今日嘅香港，政府要对市民讲啲乜都会用广东话讲，而香港拍嘅戏同作嘅歌几乎全部都系用广东话嚟去唱同埋表达嘅。广东话重同香港人嘅身份认同好有关系，好多时一个人畀唔畀人当佢系“香港人”，其中一个最重要嘅条件就系睇佢肯唔肯学讲广东话。

除咗广东话之外，香港亦都有少部分嘅人系粤人以外嘅东方人，会讲客家话、潮州话、或者系日本话呢啲东方语言。

响文字上，香港人用嘅主要系唐字（繁体）。呢种文字由上古时代嘅甲骨文演变出嚟，后嚟喺 6 至 7 世纪（大唐时期早期）左右有咗今日见到嘅样。呢种文字写得嗮中文书面语－即系普通话白话文－入面嘅字，而呢种书面语亦系香港政府公文用嘅书写系统。虽然系咁，要净系用唐字嚟写广东话就有啲难度：广东话入面有好多字都冇明显相应嘅唐字，搞到香港人讲就讲广东话，但系写嘢嗰阵就焗住要用好似普通话咁嘅中文书面语－“语”同“文”唔夹。于是乎，香港人就喺廿一世纪初头嗰阵开始整咗啲粤字，嚟去写自己嘅母语。

粤字

粤字（粤拼：Jyut⁶ zi⁶）系指一啲喺广东话度先会用到嘅字。佢哋唔系香港嘅官方文字，但系喺香港同岭南地区民间都好多人用，喺广告、电视、同埋网上讨论区呢啲地方都会见到。广东话响好耐之前已经有，但系要写佢落嚟就有啲难搞：一，佢历史太耐，有好多字嘅写法似乎都失传咗；二，佢入面有一啲百越话嘅字，嗰啲字未必会有相应嘅唐字。因为咁，香港就有咗一种粤字文化－香港人会根据《六书》嚟去创做一啲新嘅唐式方块字出嚟，好似系个“嘅”字咁－佢从口字部，表示佢喺口语上嘅用字，配埋个既字嚟去表音，就做咗个“嘅”字。除咗个“嘅”字，重有“嗰”、“啲”、“咁”、“喺”、或者“冧”呢啲。呢柞字望落都好似唐字，而且运作原理亦都同唐字好似，但系查实唔系由古汉人留落嚟嘅，佢哋嘅存在专系为咗攞嚟写广东话－所以就叫做“粤字”。

到咗廿一世纪，香港同其他岭南地方嘅民间开始有啲人主张用多啲粤文嚟写嘢，等粤人有得“我手写我口”^[4]，甚至乎连政府嘅公文同埋电视都开始有用粤字。

英文

香港畀英国人殖民过。英国派嚟帮手管香港嘅英国人都系讲英国话（粤拼：Jing¹ gwok³ waa²）嘅，而且香港又系国际商业都市，所以英国话喺呢度畀人广泛咁用，喺法律、生意、同游客区都成日见到。英国话有过千年历史，有好丰富嘅文学，同德国话系近亲，同法国话系远亲。响文字方面，英文系用咗由古罗马嗰度传落嚟嘅罗马字母（即系 abcde 呢柞字母）写。佢同唐字唔同，系一种拼音书写系统－佢直接咁将把口讲嗰啲字嘅音写落嚟，所以冇“语”同“文”唔夹呢一个问题。

英美嘅英语流行文化喺香港都有唔少影响力。香港人讲嘅港式广东话有好多由英国话度借过嚟嘅字，讲嘢嗰阵又好多时会粤英夹杂。

建筑

香港嘅传统建筑都系以粤风格嘅岭南建筑为主。香港开埠初时嗰阵有好大批嘅粤人由广东广西搬嚟香港度住，将佢哋嗰套建筑文化带埋嚟。岭南建筑本身已经系一套畀中国承认咗系好有自己特色嘅风格，而香港吸咗呢种风格之后再加咗啲西欧嘢，自然更加会有一套同北方中原唔同嘅风格。

岭南建筑

岭南建筑（粤拼：Ling⁵ naam⁴ gin³ zuk¹）好有地方特色。同北方中原地带比起上嚟，岭南地区嘅气候热得嚟又湿立立。如果将中原嗰套建筑就咁搬嚟嘅话，会好容易有温度唔舒服或者发霉呢类湿滞嘢。所以粤人整咗一套同中原人唔同嘅建筑风格。岭南建筑通常会轻啲，而且会用通透同抗霉嘅材料嚟起，色水上会多啲灰白或者系绿呢类柔和嘅色调。喺结构上，岭南建筑通常有多层嘅斜坡顶同埋方形柱，而且因为气候冇北方咁冻，令到岭南啲人钟意向外面行－所以岭南民居建筑就发展咗好多露台呢类开放式嘅结构，等人有得唞凉。总体嚟讲，呢柞特征令到岭南风格嘅建筑物望落都比较轻同凉爽。除咗咁，岭南建筑亦都普遍钟意用青砖起同会用好多浮雕做装饰。

岭南风格嘅建筑

喺广东番禺沙湾镇嘅何氏大宗祠；佢色水主要系清淡嘅灰同绿，浮雕多，用方形柱，系典型岭南建筑。
广州嘅邓氏宗祠
香港元朗屏山嘅愈乔二公祠
香港石排湾嘅妈祖天后庙

英式建筑

香港曾经做过英国殖民地，咁就自然起咗啲英式建筑（粤拼：Jing¹ sik¹ gin³ zuk¹）。香港嘅英式建筑有得分做四代^[5]^[6]：

第一代嘅建筑系以维多利亚式建筑（19 世纪中至廿世纪头，维多利亚女王在位期间嘅风格）为主。嗰阵啲建筑物主要系用嚟做军事用途，又冇建筑师帮手设计－而系由军官同埋啲士兵整－所以唔会话好有美感，好似赤柱嗰栋美利楼就好实际，完全唔会话有啲乜嘢艺术性；
第二代嘅建筑系以爱德华（指继承维多利亚女王嘅英王爱德华七世）风格为主。嗰个时代有咗建筑师呢个专门行业，令到啲欧洲人起建筑物嗰时开始会讲究美感，出咗好似安妮女王复兴式（英文：Queen Anne Revival）同爱德华巴洛克式（英文：Edwardian Baroque）呢啲风格，建筑物嘅外形开始会变到好宏伟、会有两层以上高嘅古典巨柱（Giant order）、同埋建筑中轴嘅三角形山墙（Triangular pediment）、圆垬顶（Dome）、或者塔楼（Tower），例如终审法院大楼就系咁；
第三代嘅建筑系喺一战之后起嘅，唔再用君主嚟分类命名。嗰阵时嘅西人唔想再畀希腊罗马嘅古典建筑风格限住，开始咗现代设计革命，出咗啲新风格。香港亦都畀佢哋影响咗。呢个时期嘅风格有两种：简约古典主义（Stripped Classicism）同艺术装饰（Art Deco）。前者系将古典风格嗰啲多余装饰物攞走，强调要简约得嚟又要威严。啲建筑师成日将佢用喺啲政府建筑物度。而艺术装饰风格行得再远啲，将啲装饰简化到得返啲三角几何嘅设计或者简单嘅线条；
第四代嘅建筑系以摩登主义（Modern Architecture）为主。呢种谂法强调话一栋建筑物嘅美感一定要源自佢嘅用途同功能，完全唔可以有啲不切实际嘅装饰－令到成栋嘢个造型简约得好紧要，连啲稍微多余啲嘅线条或者几何图案都冇。呢啲建筑物喺中环好常见。

香港嘅英式建筑

赤柱 1844 年起嗰栋美利楼系嗰阵时英军起嚟做兵房嘅。
1912 年起嘅终审法院大楼；栋嘢个顶度有座泰美斯正义女神像。
香港大学有好多第二代英式建筑，好似系佢嗰栋本部大楼咁（1912 年启用）。

1932 年起嘅旧湾仔警署系简约古典主义建筑－冇乜浮夸嘅装饰，但系好庄严。
1950 年落成嘅中国银行大厦；佢比起旧湾仔警署重要再简约啲，但系近睇重会见到啲线条装饰。
1962 年起嘅香港大会堂系用咗摩登主义－连啲多余嘅线条都见唔到。

围村建筑

香港新界有好多围村（粤拼：Wai⁴ cyun¹）－一啲喺成条村周围都有石墙围住嘅村落。佢哋起源喺 15 世纪左右^[7]。嗰阵南中国海沿岸有好多海盗，重成日都走嚟好似香港呢啲海边镇仔度偷嘢抢嘢。嗰时嘅香港居民为咗保护自己嘅屋企，于是就喺自己条村周围起啲矮嘅石墙，唔畀呢啲海盗入嚟。初头嘅围村主要系围头人住嘅，后嚟因为有好多岭南嘅人搬嚟香港，今日嘅围村已经有分几种－围头人同客家人呢啲社群都有自己嘅围村风俗文化。当中最多人识嘅本地围（粤拼：Bun² dei⁶ wai⁴）系围头人住嘅村，每户人都有独立嘅一间屋，成条村周围有好高嘅墙围住。啲墙嘅根基会用大麻石巩固，而墙本身多数用青砖砌，四边嘅墙有枪窿。围入面嘅建筑整齐，会有显眼嘅中轴线，神厅同祠堂会起系最尾，道门外边会掘啲护城沟，围门多数会系连环嘅铁门或者木条横栅门－呢啲结构都反映咗佢哋系为咗自卫而出嘅一种风格。

香港嘅围村建筑

元朗嘅永隆围；系本地围。
元朗嘅榄口村，都系本地围
沙田嘅曾大屋；佢系客家围村，重起咗间锅耳屋。
锦田吉庆围嘅平面图，系好典型嘅围村建筑。

唐楼

有西欧风味嘅多层式建筑物唐楼（粤拼：Tong⁴ lau⁴）系成个岭南地区响 19 世纪开始出现嘅建筑类型。佢哋喺南中国海沿岸同台湾都见得到，但系喺香港同埋澳门呢啲畀西欧文化影响得犀利啲嘅地方零舍多。佢哋主要系起嚟畀啲平民下铺上居咁住。香港嘅唐楼多数都有三到四层，每层大约系四米高左右。佢哋初头主要系用青砖起嘅，后嚟喺 1930 年代开始变成用混凝土为主。二战之后，香港嘅人口开始升得好劲。嗰时啲人唔够屋住，于是乎好多唐楼都畀人攞咗嚟整板间房。通常喺一座唐楼嘅住户度都会有一户负责做“包租”，令到港式广东话入面多咗“包租公”同“包租婆”呢两个词语。

唐楼住户嘅生活喺啲有港澳特色嘅戏同电视剧入面成日都会睇到。

香港嘅唐楼

喺旺角上海街嘅唐楼；呢种楼喺香港周街都系。
湾仔都有好多唐楼。
上环都有柞唐楼。
湾仔蓝屋；好多唐楼都好似佢咁，喺地下开间铺头。

其他

棚屋

蜑家人起嚟住喺水上面嘅棚屋（粤拼：Paang⁴ uk¹）亦都系香港有嘅一种特色建筑^[8]。佢系喺 18 至 19 世纪嗰阵时啲蜑家人嘅渔民发明嘅。佢哋传统习惯住喺水上面，唔多钟意上岸，甚至重觉得唔使上陆地系一件好馨香嘅事，所以就畀人改咗个花名叫做“水上人”。到咗廿一世纪，因为城市化同埋天然灾害嘅关系，蜑家人又开始融入咗香港主流社会，搞到香港啲棚屋开始有少少荒废咗，话唔定好快就会绝迹。

唐朝建筑

头先讲到，粤人嘅文化－岭南文化－受大唐大宋嘅汉文化影响得好犀利。而香港喺廿世纪初起嘅志莲净院就系用咗唐朝嘅建筑做板起嘅，令到佢望落同日本京都嘅佛寺群（都系攞唐朝建筑做板）好似^[9]。呢类嘅佛寺建筑喺中国大陆好难揾到－喺嗰度，好多唐宋时期嘅汉文化畀后嚟入侵中原嘅蒙古人同满州人整烂嗮。但系喺廿一世纪开始粤广地区开始咗起唐朝风嘅建筑，好似系深圳文博馆咁。

其他香港有嘅建筑风格

大澳嘅棚屋；棚屋系蜑家人嘅特色建筑。
马湾嘅棚屋
志莲净院嘅天王殿
志莲净院嘅庭院

美术

喺美术方面，香港主要都系搞岭南美术同西欧美术多。

岭南美术

岭南本身已经有好几个独有嘅美术流派。好似系岭南画派（粤拼：Ling⁵ naam⁴ waa² paai³）咁，就系揉合咗东方嘅国画同西欧嘅水彩画而变出嚟嘅新风格^[10]；而且岭南重有自己嘅一套书法、盘景、同埋园林。作为岭南嘅文化大城之一，香港都有搞开呢啲岭南美术，好似系香港嘅画家杨善深就畀人嗌做“岭南画派最后一位大师”。除咗咁，香港亦都收藏咗《袁崇焕督辽饯别图诗》呢幅岭南书法嘅诗画作品，同埋有自己嘅岭南盆景艺术学会。总体嚟讲，直至廿一世纪，香港虽然冇话出到好多特别犀利嘅岭南美术家，但系佢喺呢方面都喺度稳定咁进展紧，重已经有啲起色。

香港艺术馆间唔中都会展出呢啲岭南风嘅美术。

西欧美术

香港重有搞开啲西欧风嘅美术，例如系油画、水彩画、同素描呀咁。喺尖沙咀海边嘅香港艺术馆嗰头成日都会有一大柞艺术家聚集展示佢哋啲作品同埋帮路过嘅人画素描－已经系一种次文化，而且重出咗啲有料到嘅艺术家，好似系疯狂画室嘅刘忠发咁，佢系画炭笔素描嘅高手，可以喺五分钟之内画好一幅炭笔素描，叻到喺“世界华人艺术精品大展”度攞埋个“金紫荆艺术家奖”^[11]。

除咗画画之外，香港亦都有一个都几活跃嘅雕塑美术学会^[12]。

香港涂鸦

香港人亦都好兴整涂鸦（粤拼：Tou⁴ aa¹）。涂鸦系一种喺马路、建筑物、或者其他公共设施上面画公仔或者写嘢嘅民间艺术。佢喺古希腊同古罗马时期已经有，家吓成个欧美地区都见得到。整涂鸦嘅人未必系专业嘅艺术家，但系佢哋啲作品就好多时会好反映得到平民阶层嘅文化。严格嚟讲，涂鸦喺香港系犯法嘅，但系港府对民间嘅涂鸦基本上系只眼开只眼闭，令到香港人有咗整涂鸦嘅习惯。香港涂鸦好多样化－由典雅啲嘅书法作品以至心情日记、讽刺时弊、或者恶搞政治人物嘅作品都会有，当中人称“九龙皇帝”嘅曾灶财系一个零舍出名嘅香港涂鸦艺术家－佢啲作品甚至重有香港人觉得系香港嘅象征。到咗今日，涂鸦喺香港嘅街头巷尾（尤其系油尖旺呢啲旺嘅地区）基本上无处不在。

而家连英美嘅人都开始有啲当咗香港涂鸦系一种艺术形式。香港人自己亦都开始咗认真咁看待涂鸦，重会搞啲有关香港涂鸦艺术嘅活动^[13]。

香港漫画

漫画系一种摩登美术。喺廿世纪早期，香港已经有人画啲讽刺清政府嘅漫画。而响 1970 年代开始，香港人重开始兴睇公仔书。初头好多时都系用打打杀杀嘅武侠或者黑社会嚟做题材，但系好快就出现咗其他类型－例如系鬼故或者综合型－嘅漫画。到咗今日，香港已经周围都系漫画，无论系报纸定系书报摊都会卖香港人画嘅漫画同香港人整嘅漫画杂志（日本漫画都好受欢迎），而且书铺重会卖好多讲画漫画嘅书（多数系跟日本学嘢嘅）。香港漫画（粤拼：Hoeng¹ gong² maan⁶ waa²）喺国际社会都有啲声望－系一种其他国家嘅人都承认嘅独到漫画风格。香港嘅漫画画风好多样化，但系共通点系多数都钟意揾啲贴近现实生活嘅题材，好似系《牛仔》同《老夫子》都会描绘香港人（以至粤人）嘅日常生活。

工艺

香港系一个商业文化嘅都市。佢喺廿世纪上本节系有搞过吓工业，但系后尾话咁快就成个城市都变咗服务业同金融业做主导，搞到最后香港喺工艺方面都冇乜特别大嘅发展。而到咗廿一世纪，会喺香港搞工艺嘅基本上都系为咗兴趣嘅多。

广彩

广彩（粤拼：Gwong² coi²），全名叫做广州织金彩瓷，系一种喺白色瓷器上面加彩绘烧出嚟嘅工艺品。佢出咗名色彩绚烂，画工又精细。呢种工艺开头系喺 16 世纪尾嘅大明时期，当时啲粤人由景德镇运啲白瓷过嚟，再喺广州嗰度帮啲瓷器油颜色、加图案、再烧制。广彩后嚟重扩展咗去岭南嘅其他大城市，例如香港就喺 1930 年代开始学广州咁搞广彩。香港人开咗好几间厂整广彩，啲成品重出口去到美国、西欧国家、南美、东南亚、大溪地、同马达加斯加呢啲地方。喺 1970 年代，美国唔畀佢自己国家再入口啲有铅同镉嘅瓷器，而广彩要用得摄氏 800 度嘅低温去烧制，唔够热－冇办法清走嗮广彩瓷器入面嘅铅同镉，搞到成个香港广彩业大受打击。而廿世纪后尾嘅香港广彩业亦都冇乜点再有进展。到咗廿一世纪，香港嘅广彩业因为大陆嘅粤广地区开始识整广彩而开始冇乜点再搞，但系都重有啲瓷艺发烧友喺嗰度尝试紧将呢种工艺搞落去^[14]。

演艺

粤英荟萃嘅香港喺演艺方面可以话系好嘢多箩箩。首先，香港由岭南文化嗰度继承咗大戏呢种舞台艺术，又有搞开芭蕾舞团，而且自从喺廿世纪中期开始，香港就一路发展，有拍好多戏同埋电视剧，重一度系世界上最大嘅电影业之一。虽然话廿一世纪头嘅香港嘅演艺系跌咗少少，个市场畀日本同韩国霸咗去，但系就算喺西人嘅地方佢都重有啲热烈嘅拥趸。

大戏

大戏（粤拼：Daai⁶ hei³），正式啲嗌做粤剧（粤拼：Jyut⁶ kek⁶），系岭南传统演艺嘅代表，知名度高到畀人列咗入世界非物质文化遗产名录。佢嘅起源有得追溯到 13 世纪尾嘅南宋时期：嗰时嘅中原戏曲跟住向南走难嘅汉人一齐落咗嚟，后嚟再受西欧音乐形响咗而变成今日嘅大戏。今日嘅大戏系一种结合咗唱做念打、音乐、同埋戏服嘅综合型舞台艺术。“唱做念打”意思系大戏同时要求演员要识控制唱腔、做功架、念对白、同做武打戏。佢配乐好多变，而且重因为两广地区同西欧国家交流得多，会用好似小提琴呢类嘅西人乐器。喺西化嘅香港，大戏都重有一定嘅影响力，尤其系喺老一辈嘅人群。响香港，大戏当中嘅神功戏（粤拼：San⁴ gung¹ hei³）零舍出名。呢种戏系一种喺神诞、庙宇开光、同太平清醮呢啲拜神或者大时大节嗰阵上演嘅戏，重有自己嘅一套仪式同传统，会喺演之前拜一轮祖先或者神先嚟向祖先同神表示敬意先至开始做戏。

到咗廿一世纪，大戏喺香港一般都畀人觉得系一样老人家先会钟意嘅嘢，喺后生仔后生女之间人气唔系好高－开始有啲衰落，但系好似香港八和会馆呢类嘅大戏组织都重系继续咁努力喺香港推广大戏文化^[15]。

香港嘅大戏文化

香港历史博物馆展出嘅大戏场景
天后诞嘅神功戏
今日嘅大戏会用小提琴呢啲西人乐器。

芭蕾舞

芭蕾舞（粤拼：Baa¹ leoi⁴ mou⁵；英文：Ballet）系一种起源喺 15 世纪意大利嘅舞台艺术，尤其是系俄罗斯同法国搞得最叻。佢后嚟重出咗古典芭蕾同现代芭蕾呢啲分枝。比较多人识嘅古典芭蕾系一种透过音乐、舞台设计、同埋肢体语言嚟讲故仔嘅艺术型式，好似系《胡桃夹子》或者《天鹅湖》呢啲芭蕾舞入面嘅恋爱场面就会运用柔和浪漫嘅配乐同埋男女主角嘅共舞嚟表达佢哋之间嘅恋情。香港因为畀西欧人影响得多，都学人搞咗个芭蕾舞团，而且重真系有啲料到。香港芭蕾舞团系喺 1979 年成立嘅^[16]。佢哋啲舞蹈员有嚟自香港、中国大陆、或者日本呢啲亚洲地区，都系区内芭蕾舞蹈员嘅精英。呢个团系亚洲其中一个最大型嘅古典芭蕾舞团。佢哋最出名嘅地方系会搞西方古典芭蕾得嚟又会揾啲有东方特色嘅题材整新芭蕾，例如佢哋就曾经演过《木兰》－一场攞花木兰嘅故仔做板嘅芭蕾舞，可以话系好体现到香港粤英荟萃嘅特色。

交响乐团

交响乐团（粤拼：Gaau¹ hoeng² ngok⁶ tyun⁴；英文：Orchestra），又叫“管弦乐团”，系指一啲演奏管弦乐嘅乐团。一个交响乐团一般由四个乐器群－弦乐器、木管乐器、铜管乐器、同敲击乐器－组成，一次可以有成上百个演奏家一齐演出。乐团体制重有分大中细，当中“小交响乐团”（英文：Sinfonietta）系中型嘅交响乐团，一次演出会有五廿零个演奏家左右。交响乐团呢种演艺源自 15 至 16 世纪（文艺复兴时期）嘅意大利，后嚟话咁快就传嗮去成个日耳曼地区－包括咗英国；跟手欧洲文化大国法国又因为喺嗰时搞芭蕾舞搞得好劲，而芭蕾舞呢家嘢要揾乐团伴奏，就好快顺势搞埋一份；最后，交响乐团传嗮去成个欧洲，重跟住欧洲人去匀全世界。香港管弦乐团（Hong Kong Philharmonic Orchestra）^[17]同埋香港小交响乐团（Hong Kong Sinfonietta）^[18]分别系喺 1947 年同 1990 年成立嘅。佢哋都系属于亚洲区入面最有影响力嘅交响乐团，后者曾经畀人请去法国嘅圣里奇音乐节同埋其他好几个欧洲国家嘅音乐节嗰度演出，表现重唔错。而且佢哋有喺香港本地度推广交响乐。

粤语流行曲

由廿世纪中期嗰阵打后，英属香港发展得好快，香港人开始咗拍戏同电视剧，入面啲歌大半都系用广东话唱嘅。但系真系要数专门用广东话嚟唱歌就要去到 1970 至 80 年代先至正式开始。嗰时香港出咗郑君绵、邓寄尘、周聪、陈宝珠、萧芳芳呢柞歌手。佢哋唱嘅粤语流行曲（粤拼：Jyut⁶ jyu⁵ lau⁴ hang⁴ kuk¹）系一种畀摇滚乐、爵士乐、同电子音乐呢柞西方音乐（尤其系英国音乐）影响咗嘅新风格。佢哋题材好多样化－有啲讲情情塌塌嘅，又有啲讲友情嘅。呢啲歌全世界都好多人听，卖到去成个远东地区－包括咗日本、韩国、台湾、同东南亚－甚至乎连西人都有兴趣。英文度重开始有咗个词，专系指粤语流行曲嘅－“Canto-pop”，又或者叫做“HK-pop”。由 1990 年代尾开始，HK-pop 喺个市场度开始唔够 J-pop （日本）同 K-pop （韩国）砌，到咗家阵都重系未见到乜嘢起色。

港产片

港产片（粤拼：Gong² caan² pin³）即系香港人做导演拍嘅戏。呢柞戏多数都系用广东话嘅，但系某啲时期嘅戏当中都有啲国语片。香港喺廿世纪初头已经有喺度整啲默片同粤语残片，但系嗰时啲港产片质素唔系好高，岭南民间有人睇，但系好少可话外国会有人买。要去到廿世纪中后尾嗰阵，香港出咗李小龙、许冠杰、同周星驰呢柞有朵嘅演员，港产片先至可以话上到去国际舞台。港产片不嬲系功夫片同喜剧做主导，会有好多无厘头同港式幽默喺入面（尤其系周星驰主演嗰啲），有自己嘅一套特色。喺佢最高峰嘅廿世纪尾，港产片系世界上其中一个最大嘅电影业，连欧美都有人睇，但系佢后尾个势同粤语流行曲一样：由 1990 年代尾开始，港产片喺国际市场度嘅竞争力开始下滑，而家都重未有回升嘅迹象。

香港动画

香港动画（粤拼：Hoeng¹ gong² dung⁶ waa²）即系香港人整嘅动画。佢哋几乎全部都系用广东话嘅，主要系以戏为主，好似系《麦兜》系列咁。香港动画亦都有啲系由武侠故仔改编嚟嘅，例如系《风云决》同《神雕侠侣》。香港嘅动画好多时会请日本公司帮手画同加工，啲画风自然畀日本影响咗。香港嘅动画业可以追溯到 1948 年，嗰时嘅武侠片《江湖奇侠》入面有四分钟嘅比武斗法场面。佢入面嗰啲好似大笨象呢啲武器系用咗动画整嘅，系香港最早期嘅动画。后嚟喺 1976 年，香港无线电视开咗一个动画组，整咗一啲好似《跳飞机》同《430航天飞机》呢类嘅动画短片。 1979 年香港电影文化中心开班教人整动画，正式开始咗香港人整动画嘅历程。到咗今日，香港人已经识得喺广告同网上整动画，会有一啲恶搞性嘅动画－好似系恶搞《叮当》嘅《癫当》，重会出动画戏，当中最劲嘅要数扬威法国、加拿大、韩国、同台湾呢啲地方嘅《麦兜故事》。

文学

香港不嬲都系地少人多，活动空间细，又冇乜特别嘅天然资源，令到写嘢睇书做咗香港人其中一样仅有嘅消遣。喺呢种环境之下，香港出咗唔少有料到嘅作家，重有咗无论系响国际舞台定系唐文世界度都有些少朵嘅一套文学。英文入面重有咗个词叫做“Hong Kong literature”－香港文学（粤拼：Hoeng¹ gong² man⁴ hok⁶）。

香港文学系由廿世纪开始喺政治经济环境特殊嘅香港产生出嚟嘅文学文化。香港话就话畀人嗌做“文化沙漠”，但系查实香港人写嘅文学喺唐文世界以至成个国际社会都有啲地位。啱啱开头嗰阵，香港文学主要系由啲喺广东或者佢周围地区走难落嚟嘅文人写嘅。佢哋都系喺一个中原地区打仗打到七国咁乱又畀外国人哈嘅时代大嘅，所以佢哋写啲嘢好多时都系喺度呻自己要屈喺香港呢笪“南蛮之地”，或者系讲吓自己嘅爱国情怀。但系响廿世期中期嗰阵，香港进步得好快，啲文人就开始会谂去写一啲有香港本土特色嘅嘢，好似系马朗写嘅《太阳下的街》，就用咗 1956 年嘅九龙暴动做背景。因为嗰时嘅香港同其他亚洲地区比起上嚟叫做自由开放啲，香港人谂嘢写嘢可以冇乜顾忌，加上同西人交流得多，出咗两派思潮－主张要跟美国学嘢同用美国人风格写嘢嘅“绿背文化”同埋反对呢种谂法嘅“左派”。再打后啲嗰几廿年，香港嘅作家喺呢种自由嘅风气之下同嗰时飞跃紧嘅香港电影电视业一齐搞嘢，将佢哋写嘅其中一啲故仔拍做戏或者电视剧，出咗柞有睇头嘅作家^[19]。

睇体裁嘅话，香港文学嘅特色系钟意揾现实做主题，佢哋啲题材好贴近社会同生活，恋爱故仔同埋系讲社会生活嘅散文普遍都受欢迎－好似系人气作家张小娴同陶杰呀咁。但系香港都有出过第啲体裁嘅作家，好似系写武侠嘅金庸同古龙，重有系写科幻嘅倪匡。而喺近呢几年，香港开始兴网上小说，喺后生之间好有人气，开始有唔少后生作家搞，令到佢做咗 80 同 90 后嗰代香港文学嘅新兴势力。总体嚟讲，要数香港文学嘅主要作家嘅话有：

张小娴，写言情同散文；出名嘅作品包括《面包树》系列同《都会爱情》系列。
陶杰，出咗名推崇欧美文化；佢主要写啲讲文化嘅嘢，好似系喺报纸杂志度写啲讨论西人文化嘅文。
金庸，主打武侠；佢出咗《天龙八部》同《神雕侠侣》。
古龙，都系打武侠；佢嘅代表作有《楚留香传奇》同《小李飞刀系列》。
倪匡，主打科幻；佢系好出名嘅《卫斯理》系列同《原振侠》系列嘅作者。

粤文文学

虽然话香港有唔少有本事嘅作家，但系用自己嘅白话写文学都重系少见。喺呢方面，成个广东话地区同其他东北亚地区－包埋韩国同越南－好似，传统嚟讲“语”同“文”系分开嘅：讲嘢用各自嘅本土白话，写嘢就用文言文。要喺成 19 世纪尾，呢一头先开始有人正式咁用白话化啲嘅文字嚟写文学。之不过，大中华地区都重系离唔开用中文书面语－而中文书面语系攞普通话做板嘅，唔算系广东话地区嘅白话。呢一样嘢香港都走唔甩。头先提咗嘅作家写嘢冚唪唥都系用中文书面语，而唔系用粤文。但系喺廿一世纪开始有人主张用粤文嚟写文学^[20]。

玩嘅嘢

香港玩具

香港玩具（粤拼：Hoeng¹ gong² wun⁶ geoi⁶）即系香港人玩嘅一啲经典玩具，包括咗象棋、波子棋、飞行棋、陆军棋、东南西北、乐高积木呢啲。呢柞玩具虽然唔算系香港独有，但系好多香港人细个嗰阵都钟意玩，令到佢哋做咗香港人嘅集体回忆之一。而且由 1960 年开始，香港重有整啲自制玩具，甚至有人话要将香港打造成“玩具港”^[21]。到咗今日，香港已经有定时定候搞一啲玩具展览，而且有开始自己学整一啲玩具，重出咗几只有睇头嘅视像游戏，可以话系喺呢方面开始有起飞嘅迹象。

视像游戏

香港人都整咗好几只视像游戏（粤拼：Si⁶ zoeng⁶ jau⁴ hei³）。视像游戏系泛指一啲识得喺一个显示屏上面出画面畀回输同埋同玩嗰个人互动嘅计算机程序。佢哋系一种包含咗程式设计、视象设计、同音乐等各方面媒体嘅娱乐，喺全世界都有人钟意，喺后生仔后生女之间人气特别高。而且重有研究话某啲类型嘅视像游戏可以提升玩嗰个人嘅反应。到咗廿一世纪，香港视像游戏正系处于起步阶段，出咗几只有啲料到嘅视像游戏：

饮食文化

香港人嘅祖先由两广地区度带咗啲粤式饮食落嚟，后嚟同西人同日本人等嘅外国人交流得多，开始有咗少少自己嘅风格。

粤式饮食

香港人嘅传统饮食有齐嗮老火汤、饮茶、点心、凉茶、糖水、同烧腊呢啲特色嘢－好明显系广东菜：广东菜（粤拼：Gwong² dung¹ coi³），又叫做广州菜（粤拼：Gwong² zau¹ coi³），正式啲叫做粤菜（粤拼：Jyut⁶ coi³），系指粤人独有嘅一种传统𩠌菜同煮𩠌嘅方法。广东菜系喺 10 至 13 世纪嗰时大致上有咗今日呢个样嘅。佢系一种用料开放、清淡、讲究火候、同善用汤水嘅𩠌菜。因为粤人历史上多次规模移民去外国，令到佢喺国际社会都有啲认受性。呢个菜系历史起码有得追溯到去 13 世纪，而且佢成个食谱极之长，喺 1965 年嘅“广州名菜美点展览会”就数到成 5457 款𩠌菜咁多。而喺廿一世纪嘅香港周围都见得到呢啲粤式嘢食同嘢饮。

香港嘅粤式饮食

粤式早餐成日都见到油炸鬼。
香港人同其他粤人一样，好钟意食叉烧。
香港人都钟意食糖水。当中嘅豆腐花好有人气。
港式月饼嘅外形似广式月饼，但系会有冰皮呢类得意搞作。

成个岭南都好兴喺海边开海鲜餐厅。粤人会好似幅图入边咁用个水缸养住啲海鲜。香港人都系咁。
西贡有条海鲜街，而且好多游客帮衬。
香港嘅一间烧腊舗；烧腊亦都系广东菜嘅特色嘢食之一。

地道饮食

虽然话就话香港嘅传统饮食系以粤式嘢为主，但系香港因为畀英国殖民同大陆粤广地区隔开咗百几年，有咗少少自己嘅作风。大牌档、茶餐厅、丝袜奶茶、豉油西餐、好多嘅街头小食、瑞士鸡翼、蛋挞、同埋私房菜呢啲都畀人觉得系好有香港地道特色。总体嚟讲，香港啲地道饮食主要特色系讲求快同方便－反映香港嘅商业文化。

茶餐厅

大牌档（粤拼：Daai⁶ paai⁴ dong³）曾经系一种周街都系嘅食肆，但系因为卫生条例同政府许可证问题，搞到大牌档开始绝迹。佢哋慢慢将佢哋嘅茶水档搬去室内，并结合以菠萝冰、杂果冰同红豆冰做招徕嘅冰室，演变咗做茶餐厅（粤拼：Caa⁴ caan¹ teng¹）^[22]^[23]。廿一世纪嘅香港茶餐厅系一种平民嘅快餐饮食文化。佢哋嘅伙记同啲客嘅关系好多时都系好似老友咁，好多时啲嘢食都系讲求快得嚟又唔肥腻，符合香港人嘅生活方式。嘢食方面，佢哋全日都会提供即食面、云吞面、米粉、煎蛋、糭、同粥呢啲平嘢食。早餐就通常有牛油面包、多士、鸡蛋、肠仔、咖啡、奶茶、同蛋挞呀咁。大啲嘅茶餐厅重会有炒粉面，好似系干炒牛河、福建炒饭、炒贵刁、厦门炒米、同星洲炒米。有啲好似太兴烧味茶餐厅兼营埋烧味业务。当日本菜喺香港开始受欢迎嘅时候，茶餐厅亦都开始供应日本熟食。饮食风格上，茶餐厅有齐粤同英嘅特性：佢会提供好多广东菜嘅嘢食－好似系油炸鬼同炸两呢啲粤式早餐嘢食喺茶餐厅早餐时段都会见到，但系又会见到啲英式嘢食，好似系咖啡、奶茶、或者蛋挞呢啲^[24]。

茶文化

香港嘅茶文化主要系由粤式茶文化演变出嚟嘅。同粤人嘅传统饮茶有少少似，香港人（尤其系成年男人）好多都钟意响朝头早返工之前去茶楼一路饮早茶一路叹“一盅两件”一路睇报纸。而且就算唔去茶楼，香港人都好兴用啲茶包喺自己屋企度冲茶嚟饮。

港式茶文化最出位嘅系有自己一套风格嘅奶茶－丝袜奶茶（粤拼：Si¹ mat⁶ naai⁵ caa⁴）。据讲香港畀英国统治嗰阵，英国人将“下午茶”呢个概念带咗嚟香港：西人习惯咗喺下晏三点钟左右走去享受西茶同甜品，同华人唔同。畀呢种文化影响咗，香港人重创造咗“丝袜奶茶”呢样嘢。所谓嘅“丝袜奶茶”，系指紧将煮好咗嘅红茶用一个棉线网过滤吓，除咗隔走啲茶渣之外，重会令到红茶更加香滑。传统嘅港式丝袜奶茶会将淡奶加落煲好嘅锡兰红茶度。原创人本嚟系用白布袋过滤啲茶嘅，但系家吓大部分茶餐厅都系用棉纱网镶喺一个金属框架度整。因为棉纱网畀奶茶浸得多，个网嘅颜色会变到同丝袜好似，所以有咗个名叫“丝袜奶茶”。到咗今日，丝袜奶茶已经做咗香港嘅非物质文化遗产^[25]。

港岛金钟嗰度开咗间茶具文物馆嚟展览同推广唐式茶文化。

豉油西餐

豉油西餐（粤拼：Si⁶ jau⁴ sai¹ caan¹），又叫“港式西餐”，系一种有香港特色嘅“西餐”^[26]。佢并唔系真系西人食嘅嘢（重有，呢个世界上查实根本冇“西菜”呢样嘢，只系有法国菜、意大利菜、西班牙菜、同埋俄罗斯菜呢啲），但系喺香港嘅“西餐厅”度成日都会见到。佢起源喺英治时期。嗰阵时会嚟香港嘅西人都系啲有头有面又有钱嘅人。佢哋地位高，会喺自己嘅地头度食啲高档嘢食。香港嘅粤人平民多数都系食唔起西人食嗰啲餐，但系又好羡慕佢哋咁高档，所以就自己学煮西人食嗰啲嘢，好快重开始咗攞呢啲嘢食嚟卖－呢啲嘢食就系豉油西餐。豉油西餐会好似西欧传统嘢食咁有好多扒类肉食同埋餐包，亦都会用刀叉食，但系啲煮嘢食技巧就用咗好多广东菜嘅技法，会用豉油同松肉粉嚟煮肉，啲罗宋汤又会用番茄膏整（而唔系用正统嘅红菜头；重有，罗宋汤系东欧嘅嘢食）^[27]－即系用粤人嘅煮嘢食方法嚟煮西欧嘢食。总体嚟讲，豉油西餐其实唔似任何一种真正嘅欧洲菜。虽然系咁，豉油西餐喺香港好有人气，好多茶餐厅同快餐店都会卖。

街头小食

香港人喺 19 世纪嗰阵已经好钟意食街头小食，符合佢哋急速嘅生活节奏。到咗廿一世纪，街头小食（粤拼：Gaai¹ tau⁴ siu² sik⁶）已经系香港饮食文化走唔甩嘅一部分，鱼蛋、鸡蛋仔、肠粉、碗仔翅、砵仔糕、格子饼呢啲都系好有人气嘅街头小食。大部分香港街头小食都系由广东传过嚟嘅，但亦都有啲系其他地区嘅嘢食，例如系萨琪玛，就系满洲嘅小食。有啲嘢更加系香港独创嘅，好似系老婆饼同老公饼咁。香港人普遍都钟意喺旺角呢啲旺啲嘅地方度买啲街边小贩卖嘅小食，一路食一路行街，系一种好有本土特色嘅景象。

围村盆菜

盆菜（粤拼：Pun⁴ coi³）系新界围村嘅饮食文化。佢系一种大杂烩，将好多种肉类、蔬菜、同埋海鲜用个大盆装住，加啲自制酱汁，再成班人坐低一齐食。传统嘅围村盆菜多数系用木盆或锑盆装住。而向喜庆节日－新居入伙、祠堂开光、或者新年点灯－新界嗰啲乡下人都好兴搞啲大型嘅盆菜宴，会成大班围村人聚埋一齐食盆菜得嚟又会收钱请围村以外嘅人一齐食佢哋整嘅“正宗围村风味”盆菜^[28]。而且喺廿一世纪开始，香港好多食肆都开始供应佢哋自己学整嘅盆菜，攞嚟喺大时大节嗰阵卖。

传统节庆

粤英荟萃嘅香港人有好多传统节日，有啲系粤人以至其他唐人都会庆祝嘅，但系就算系咁，香港人会好似其他粤人咁会有一啲佢哋独有嘅习俗，好似系过年：过年行花市同买花返屋企呢家嘢系粤文化嘅特色；海外华人好多都会咁做，因为佢哋一路都系粤人占咗多数；而香港人都会做呢样嘢。但系粤人以外嘅唐人就好少可会搞呢样嘢。香港重有一啲本土特色节庆，例如系车公诞咁。好多香港嘅传统节庆都充满咗欢乐嘅色彩，又热闹又精采，有舞龙舞狮、飘色巡游、赛龙舟、舞火龙、神功戏、祈福许愿等。

唐式节庆

港式过年传统：

其他唐式节日：

粤式节日：

西式节庆

本土节庆

香港嘅特色节庆

太平清醮嘅重头戏－抢包山
每次到咗车公诞，沙田车公庙就会迫满嗮人。
林村许愿树；香港人传统相信掟个宝牒上去佢度就可以令愿望成真。外国人嗌呢个做“香港许愿节”^[29]。

核心价值

香港核心价值（粤拼：Hoeng¹ gong² hat⁶ sam¹ ga³ zik⁶），又叫做“狮子山精神”，系一个喺廿一世纪初以嚟就有好多香港人倾紧嘅一个议题^[30]。佢重未有一套公认嘅精确定义，但系一般都会畀人觉得系指紧一啲香港赖以成功嘅价值观。喺 2004 年 6 月，香港有一班专业人士喺报纸度一齐撰咗篇叫《香港核心价值宣言》嘅文，列举咗一啲香港核心价值可能嘅内容，令到成个香港社会开始倾到底乜嘢先至算系香港人嘅核心价值。佢哋列嘅价值包括咗：

香港中文大学香港亚太研究所喺 2014 年10月30日（雨伞运动嘅第 33 日）发表咗份民调，用电话访问咗 804 个成年嘅香港人，问佢哋对 11 样核心价值有几同意。结果列咗喺下面个表度。睇佢个势，冇边一样价值零舍突出。有人话咁系反映咗香港包容多元文化同价值观，好有香港嘅特色^[31]：

核心价值	同意程度	最重要
法治	92.7%	22.9%
公正廉洁	92.3%	15.3%
追求社会稳定	88.2%	8.3%
自由	88.1%	20.8%
和平仁爱	87.4%	5.5%
保障私人财产	86.5%	1.9%
重视家庭责任	84.5%	0.6%
民主	83.2%	11.1%
多元包容	79.8%	2.5%
市场经济	76.5%	3.5%

类似嘅思想理念有支撑住现代美国同工业革命时期嘅英国嘅古典自由主义（英文：Classical Liberalism）。

次文化

互联网文化

香港地少人多，冇乜活动空间，上网玩电脑变咗做香港人其中一样仅有嘅搞作，令到香港出咗好多互联网文化（粤拼：Wu⁶ lyun⁴ mong⁵ man⁴ faa³），重有自己嘅一套术语－已经系一种次文化，好似系高登讨论区同埋香港网络大典呢啲嘢都系香港人整嘅。香港互联网文化出咗名会创作好多俗语，甚至有啲会令睇得明正常粤文或者中文嘅人都睇到一头雾水，畀人嗌做“火星文”。网志亦都好有人气，亦都有好多香港人会喺网上整啲二次创作嚟恶搞时事人物。总体嚟讲，香港互联网文化好活泼，钟意恶搞，又作风自由，系一个可以畀唔同谂法互相碰撞嘅虚拟空间。

集体回忆

集体回忆（粤拼：Zaap⁶ tai² wui⁴ jik¹）系一个由法国社会学家 Maurice Halbwachs 喺 1925 年提出嘅概念，系指一个群体或者社会入面嘅人共享同埋一齐传承嘅嘢。喺香港人心目中好多嘢都系集体回忆^[32]：粤语流行曲、出名嘅港产片同电视剧、本土嘅饮食文化、三年零八个月、香港主权移交呢啲往事或者文化产物都可以系香港集体回忆嘅一部分。喺 2006 年 11 月港府将爱丁堡广场码头拆咗嗰时开始，香港人开始倾佢哋啲集体回忆，而响 2007 年 1 月，港府更加讲话将集体回忆列做拆唔拆历史建筑嘅考虑因素之一。响廿一世纪初，香港人重开始咗整一啲用集体回忆做题材嘅戏，好似系《我爱HK开心万岁》、《72家租客》、《岁月神偷》呀咁。

少数族裔

香港嘅少数族裔（粤拼：Siu² sou³ zuk⁶ jeoi⁶）通常系指一啲住喺香港嘅非华人，尤其系南亚裔或者东南亚裔嘅人^[33]。呢个词有时唔包日本人、韩国人、或者系越南人呢啲住喺香港嘅东北亚人－因为佢哋望落同香港嘅粤人、非粤藉华人、或者本地人冇乜大分别，都系蒙古人种东亚型。喺呢啲少数族裔当中，南亚裔嘅多数系英治时期嚟香港打啲雇佣兵之类嘅工嘅。佢哋都有自己嘅文化同信仰－多数系南亚嗰头兴嘅教，好似系印度教、锡克教、伊斯兰教、同拜火教呢啲。另外，亦都有好多东南亚人嚟香港做外佣，好似菲律宾人同印尼人就好兴每逢礼拜日就喺香港嘅某啲地区嘅公园度聚集，系好有本地特色嘅景象。

围头文化

香港嘅围村重有一套自己嘅文化同风俗^[34]^[35]^[36]。除咗头先讲咗嘅盆菜宴习俗之外，香港啲围村重有自己嘅语言－围头话。围头话同广东话好接近，但又唔系完全互通得到，而且又有好多独有嘅词汇。去到廿世纪尾橛，围头话已经开始消失，围头人嗰啲后生仔后生女多数都最多只系识得听，唔识得讲。虽然系咁，好多围头人都重系喺度承传紧佢哋独特嘅习俗，好似系添男丁要点灯同埋九钵盆菜呢啲。去到廿一世纪，香港人开始倾点样保育围村嘅传统文化遗产。

其他

香港考试文化

香港示威文化

港铁文化

象征物

洋紫荆

洋紫荆（粤拼：Joeng⁴ zi² ging¹），又叫“香港兰”（Hong Kong orchid），可以话系香港嘅象征符号。佢喺 1880 年嗰阵畀一个神父发现，后嚟喺 1908 年畀植物学界判定系之前未见过嘅新品种。洋紫荆跟手喺 1965 年嗰阵正式做埋香港嘅市花：当时啲人系话呢种花寓意咗香港呢个远东海港，好似嗰棵喺 1880 年喺野外畀人发现嘅洋紫荆咁，系一个珍贵又独特嘅大发现。而喺 1997 年主权移交之后，香港嘅特区区旗重系攞咗洋紫荆嚟做板嘅。到咗今日，洋紫荆已经系香港嘅象征物，啲人一见到洋紫荆就会谂起香港。香港嘅重要地标之一金紫荆广场嗰度重起咗座好大嘅金色洋紫荆雕像。

狮子山

狮子山（粤拼：Si¹ zi² saan¹），英文叫“狮子石”（Lion Rock），系九龙同新界之间嘅一座山，九龙山脉嘅其中一个峰，因为佢形状似只仆喺度嘅狮子所以咁嗌。喺狮子山旧石上面可以睇到嗮成个维多利亚港，所以好多行山人士同游客都兴行上去嗰度。狮子山重喺香港身份认同度扮演咗重要嘅角色：二战同国共内战嗰时有好多华人（主要系粤人）走难落嚟香港，而且系低下阶层嘅多。佢哋到咗步就喺狮子山对开嘅九龙起咗成大柞山边寮屋、唐楼、公共房屋、工厂大厦、同山寨厂嚟定居，令到“狮子山下”做咗当时香港社会嘅象征。香港电台后嚟重整咗《狮子山下》呢套电视剧，令到狮子山下嘅景象做咗香港人嘅一种集体回忆，而且香港核心价值重有咗另外一个名－叫“狮子山精神”。狮子山可以话系代表香港嘅重要象征物。

大眼鸡

大眼鸡（粤拼：Daai⁶ ngaan⁵ gai¹）系一种粤式帆船。旧时喺广东嗰头成日见到佢，主要系嗰度啲粤人用嚟做生意同运货嘅。因为香港畀咗英国之后就系咁同外界搞生意，加上香港人又系以粤人为主，所以大眼鸡喺嗰时嘅香港可以话周围都系。到咗廿一世纪，香港已经唔会再用大眼鸡运货，但系始终呢种船见证咗香港嘅历史，所以香港啲旅游单张嗰度成日都见到佢，而且好多香港人都钟意靠佢揾食－好似系用大眼鸡嚟开水上餐厅，或者系用佢载住啲游客游维港呀咁。

香港影像

香港特区区徽上面有洋紫荆嘅图案。
1985 年嘅香港好繁荣。
天星小轮系廿世纪后半期嘅香港特色景象，喺廿一世纪已经见唔到。
当铺系廿一世纪嘅香港重可以见得到。
香港有个花名叫“美食天堂”，世界各地嘅嘢食都可以喺度揾到。
茶餐厅有卖港式嘅西多士。
香港人又好钟意食日本菜。
香港又有个名叫“购物天堂”，周围都系商场。
三板系旧时啲渔夫用嚟喺上面住嘅。今日佢哋多数净系用嚟载住啲游客玩。
金钟嘅中银大厦系香港一个特色景象。
港岛嗰度有好多电车。
尖沙咀嘅香港太空馆
沙田嘅文化博物馆
2012 年维园年宵花市
2012 年维园中秋嘉年华
夜晚嘅维港
碧街嘅一间大排档
2017 年嘅粉岭围村公所
香港周围都有好多公共屋邨。
2006 年香港海洋公园嘅入口
1912 年嗰阵嘅香港大学

睇埋

其他香港文化

香港公民社会

其他

珠江文明

考

出面网页

香港旅游发展局

[[Category:香港文化| ]]

[1] 广府文化与百越族文化的关系

[2] 崖山之后无中国,阎吏之后无汉人

[3] 香港流行文化的日本影响

[4] 粤文

[5] 香港原来有四代殖民地建筑！

[6] 香港的殖民色彩建筑

[7] 新界围村之由来

[8] 大澳棚屋

[9] 南园莲池/志莲净苑仿照唐代艺术的古式园林与佛教庙宇～

[10] 岭南画派 - 岭南画派的渊源

[11] 疯狂画室 Gibson Lau 刘忠发

[12] 香港雕塑双年展2016

[13] Mongkok’s Graffiti Wall Of Fame!

[14] 香港仅存广彩瓷厂　首度展览经典瓷画

[15] 香港八和会馆

[16] 香港芭蕾舞团

[17] HKPhil

[18] 香港小交响乐团

[19] 香港文学数据库

[20] 启蒙与革命－郑贯公、黄世仲等人的粤语写作

[21] “香港玩具传奇”专题展览讲座

[22] 香港人的骄傲——冰室、餐室、茶餐厅文化（上）

[23] 香港人的骄傲——冰室、餐室、茶餐厅文化（下）

[24] 【动画●殖民产物】茶记酒楼有…英国留给我们的好西

[25] 奶茶列香港非物质文化遗产

[26] 西餐爱港味，太阳报，2013年7月17日

[27] 名厨精装贵格港式西餐，香港新闻网，2013年7月17日

[28] 6大围村风味盆菜

[29] Hong Kong Well Wishing Festival

[30] 施政报告－维护香港核心价值

[31] 中大香港亚太研究所民调：香港核心价值多元多样

[32] 香港人的集体回忆

[33] 香港政府统计处－二零零一年及二零零六年按种族划分的人口

[34] 关于围村，你不知道的事

[35] 传统围村小食工作坊

[36] Home of Indigenous Culture 传统围村文化之家

[1]

[2]

[3]

[4]

[5]

[6]

[7]

[8]

[9]

[10]

[11]

[12]

[13]

[14]

[15]

[16]

[17]

[18]

[19]

[20]

[21]

[22]

[23]

[24]

[25]

[26]

[27]

[28]

[29]

[30]

[31]

[32]

[33]

[34]

[35]

[36]

点嚟