User:Richard923888/DC15工作区/大改善/嶺南文化-粤
_flowers_in_Kolkata_W_IMG_4132.jpg)
Template:跳轉 嶺南文化（粵拼：Ling5 naam4 man4 faa3），又叫南粵文化（粵拼：Naam4 jyut6 man4 faa3）、廣府文化（粵拼：Gwong2 fu2 man4 faa3）、或者珠江文化（粵拼：Zyu1 gong1 man4 faa3），係嶺南地區（指五嶺以南嘅地區）獨有嘅地域文化。佢包咗廣東、廣西、香港、同埋澳門嘅文化。呢個詞語一般都係指緊呢頭嘅粵文化，但係廣義上有得包埋區入面嘅客家文化、潮州文化、同埋廣西嗰啲少數民族文化。
喺地理上，嶺南地區係亞熱帶氣候（Subtropical climate），天氣又暖又潮濕，比起同樣係畀山隔開嘅福建多農地，坐正喺珠江呢條大河上面，自古以嚟又靠海揾食同成日同外界搞生意，所以佢嘅地方文化偏向係農業文化、海洋文化、同商業文化。再加上佢喺發展嘅過程入面吸收咗好多西歐傳嚟嘅文化，令到嶺南文化同其他華人地區嘅文化好唔同，最明顯嘅係喺七方面：語言（主力係廣東話）、建築、美術、工藝、演藝、文學、同埋飲食文化。除咗呢啲，嶺南重有好多獨特嘅風俗（好似係喺過年嗰陣行花市或者係執骨嘅習俗）同埋流行文化。
中國社會科學院喺 2006 年深圳咸頭嶺新石器時代遺址嘅考古工作掘到好多紅燒土、陶質生活工具、同埋石器。科學測定話嶺南地區喺 6000 至 7000 年前嘅新石器時代中期嗰陣已經有人住，而且重有一定程度嘅文明。根據呢個發現，珠江文明嘅歷史可以推算到公元 5000 年前（距離而家 7000 年前），悠久歷史唔謯過黃河文明同長江文明。
總體特色
對外開放
喺好耐之前，嶺南已經對外開放，南海神廟有波羅國使者嘅雕像，喺西來初地重有達摩祖師嘅遺跡（達摩祖師係波斯人）。因為自古以嚟嶺南地區一路同外國做生意，再加上離中原心臟地帶（北方）遠，呢一帶好多時都係接觸各國嘅人多過北方中原人，所以有好多非中原嘅宗教同思想傳咗入嚟。佛教、道教、好幾派嘅基督教、回教、同各種自然祟拜喺呢一帶度百花齊放。好似係拜孔孟呢啲中原嘅宗教儀式反而好多時都喺嶺南唔興。除咗咁，嶺南畫派同廣東菜等都吸咗好多西歐文化嘅元素喺入面。呢啲都表現咗粵人肯包容同接納外來文化。
睇重商業
近呢千幾年嚟，嶺南地區響好幾個朝代都係做中原皇朝嘅主要對外港口（尤其係對東南亞）。所以粵人好多時都係要靠行船行商揾食，廣州同佛山變咗做大商埠，再加埋後起之秀嘅香港，對外行商一路以嚟都係粵人嘅經濟命脈。粵人好多都為咗做生意搬咗去東南亞度住，近嘅去越南或者泰國，遠嘅有啲去到印尼同澳洲－令到海外華人一路都係粵人佔咗多數。嶺南重出咗好多人識嘅廣東商人幫。呢啲地理文化特色令到粵人偏向講着數，睇重商業發展。
點嚟
由百越到漢化
喺公元前 110 年嗰陣，控制住嶺南地區同而家越南北部嘅古國－南越國 [1]－畀漢朝帝國打冧咗，令到呢笪地喺歷史上第一次做咗中原皇朝嘅領土。雖然係咁，嗰時已經有百越族（粵拼：Baak3 jyut6 zuk6）喺呢一帶度住。後嚟喺 7 至 13 世紀（大唐同大宋嗰段時期），因為中原嗰頭畀胡人大規模侵略，搞到有大批古漢人（百越族因為漢文化程度唔夠，唔畀人當係漢人）走難去咗嶺南度住。打後嗰幾個世紀，嶺南嘅古漢人同百越人一齊住兼通婚，令到嶺南文化有齊百越文化同唐宋文化嘅元素喺入面：好似係今日嘅廣東話，佢保留咗少少百越話嘅特徵，但係總體又好近唐宋人講嘅中古漢語，重攞得嚟讀唐詩宋詞。
呢樣嘢亦都反映咗喺血統上面：直至廿一世紀，粵人普遍都有齊古漢人同百越人嘅血統[2]。
做咗漢人
雖然話 13 世紀嘅嶺南喺文化上係漢化咗，但係蒙古人統治嘅大元帝國將嶺南嘅人分類做南人而唔係漢人，而且地位重要低漢人一等。要喺成 15 世紀左右（大明時期）開始，粵人先至正式畀人承認係漢人。喺嗰時，嶺南地區因為靠海又近東南亞，做咗大明同西歐人做貿易嘅主要港口，吸收大明文化之餘重學咗好多西歐文化。好似係嶺南畫派咁，就係揉合咗遠東嘅國畫同埋西歐嘅水彩畫而變出嚟嘅新風格，廣東菜亦都吸收咗好多西人嘅煮嘢食方法。由嗰陣時開始，嶺南文化就一路咁發展，喺建築、美術、工藝、演藝、文學、哲學、同生活文化嘅層面都有唔差嘅成就。
摩登時代
喺廿世紀中期開始，英屬香港喺各方面都進步得好快。東方之珠嘅成就令到好多粵人都對香港好嚮往。香港嘅廣東話流行文化（包括流行曲同戲）喺嶺南地區有好大嘅影響力，例如係好多住喺中國大陸嘅粵人都鍾意收睇香港拍嘅戲同電視劇，而且重會學香港人咁用繁體字寫嘢。而喺香港方面，因為香港人同其他亞洲國家嘅商業、文化、同學術交流得多，吸咗好多日本、韓國、同臺灣嘅文化。好多香港人都當食壽司或者其他日本嘢食係家常便飯，重將「達人」、「駅」、同「の」（意思係「嘅」，粵音係 zi1）呢啲日文字加咗入自己嘅日常用語裏面，形成咗所謂嘅「港式廣東話」。
傳統語言
廣東話
響嶺南最有人氣嘅語言係廣東話（粵拼：Gwong2 dung1 waa2；又叫「廣州話」）。嶺南嘅傳統戲曲同民歌多數都係用廣東話嚟去唱同表達嘅。廣東話嘅歷史有得追溯到去公元前嘅南越國時期。當時住喺嶺南嘅係百越族，佢哋講嘅話唔屬於唐話。但係後尾佢哋畀中原王朝統治，跟手唐朝同宋朝嗰時又有大批古漢人搬咗去嶺南住，漢越雜處，令到廣東話慢慢成形做一種有唐話嘅文法同發音，但又保留咗些少百越特色嘅獨特語言：今日嘅廣東話係中古漢語（Middle Chinese）－即係唐宋人講嘅話－嘅直系後裔。佢明顯似唐話：砌句子啲規則同吳方言、閩南話、同客家話有好多明顯似嘅地方；佢重保留咗好多中古漢語嘅音，讀得到唐詩宋詞－而呢樣嘢普通話反而做唔到。但係廣東話嗰啲日常用語入面都重見到啲百越話嘅特徵（呢點同越南話好似），好似係喺文法上廣東話有時會將修飾語放響個名詞後面。總括嚟講，現代廣東話保留到唐宋嘅遺風得嚟，又唔會話完全冇晒百越嘅特色。
廣東話近親
雖然係咁，廣東話唔係嶺南地區唯一有人講嘅話。首先，嶺南有四邑地區嘅台山話（粵拼：Toi4 saan1 waa2）同廣西嘅廣西平話（粵拼：Gwong2 sai1 ping4 waa2）。呢兩種話同響廣州同港澳地區講嘅標準廣東話好似，但又唔完全互通。喺語言學上嚟講，如果兩種話傾到偈，佢哋就係同一種話：例如係英式英文同美式英文，佢哋雖然係有少少分別，但係英國人同美國人傾偈冇問題（互通性接近百分之百），所以係同一種話；而英式英文同德國話雖然都係由古代嘅日耳曼族講嘅話演變出嚟，但係而家佢哋嘅分別大到完全傾唔到偈（互通性差唔多係零），所以係唔同嘅話。相比之下，台山話同廣西平話嘅情況就有啲曖昧：佢哋同廣東話好似，傾到啲偈，但唔見得係完全互通（互通性大約係百分之五十），而且台山話重有自己嘅一套民歌。所以啲學者重拗緊：佢哋有時會將台山話同廣西平話當做廣東話嘅分枝，有時會將佢哋當做第種話。
其他語言
廣東重有好多客家人，佢哋嘅客家話都係屬於唐話。但係因為響好耐之前佢哋就同廣東話分開咗獨立發展，今日嘅客家話同廣東話已經有好大分別，兩種話完全傾唔到偈。而且客家文化喺建築、音樂、同飲食呢啲方面都明顯同粵文化好唔同。海南同潮州亦都有屬於閩語系嘅海南話同潮州話。最後，廣西亦都有好多少數民族，其中最顯眼嘅係壯族，佢哋都有自己嘅話，而且都唔屬於唐話。
建築
嶺南建築（粵拼：Ling5 naam4 gin3 zuk1）好有地方特色。同中原核心地帶（即係北方）比起上嚟，嶺南地區嘅氣候又熱又濕立立，如果將中原嗰套建築風格直接搬落嚟嘅話，會好容易有温度唔舒服或者發霉呢類濕滯嘢。所以粵人整咗一套同中原人唔同嘅建築風格。古典嶺南建築通常比較輕，而且會用通透同冇咁易發霉嘅材料起，色水會偏好灰白或者係綠呢啲柔和嘅色調。喺結構方面，呢啲建築通常有多層嘅斜坡頂同方形柱，而且因為氣候冇中原地方咁凍，令到嗰度啲人鍾意向外面行，所以嶺南民居建築就發展咗好多露台呢類嘅開放式結構，等人有得唞涼。總體嚟講，呢柞特徵令到古典嶺南風格嘅建築物望落都比較輕同涼爽。就算到咗今日，古典嶺南式建築物喺廣州呢啲大城市嘅商店街成日都會見到。
方位同門
粵人喺起屋嗰陣好講究方位，主要係畀強烈嘅風水文化形響咗。粵人起屋嗰陣好多都會請返個風水師去搞佈局。佢哋喺門方面零舍執着－佢哋重有句俗語話「大門朝南，子孫不寒，大門朝北，子孫受罪」：間屋嘅門面向南會畀人覺得係象徵住權力同威嚴，所以一般起屋（尤其係比較有錢嘅人家）都會特登將道門向住南面，而祠堂基本上一定會咁做。大啲嘅屋企建築重會有好幾種唔同嘅門，好似係中門、側門、同儀門呀咁。「中門」響舊時通常都淨係會畀身分地位比較高嘅人－即係屋企嘅男主人、高官、或者抱住男丁嘅女人－行過，而其他人就淨係准用「側門」。「儀門」就係祠堂好多都會有嘅；喺大門之後重有第二道門。呢種門嘅存在主要係因為粵人好多都覺得一入大門就直衝祖先會好肉酸。
雕塑裝飾
傳統上，粵人好鍾意用雕塑同浮雕嚟裝飾建築物。同其他唐人起嘅祠堂比起上嚟，粵人嘅祠堂就鍾意擺好多用木頭同石頭整嘅人物靈獸雕塑去做裝飾，嚟達到「光宗耀祖」嘅效果。嶺南建築雕刻主題好多樣，有歷史故事、神話傳說、吉祥圖案、飛禽走獸、奇花異草呀咁。亦都有啲比較有本地特色嘅景物，好似係洋桃、番石榴、香蕉樹、木棉、同榕樹呢啲嶺南地區成日都見到嘅生果同植物。
青磚
青磚（粵拼：Ceng1 zyun1）係喺嶺南地區好多人用嘅建築材料。佢呈青黑色、密度高、透氣、吸水、抗氧化、淨化空氣，又唔容易變色變形，重好恆温。因為佢呢啲特性，用青磚起嘅屋好捱得到濕氣，夏天嗰陣又會好涼爽－最啱用嚟喺又熱又潮濕嘅嶺南地區起屋。
鍋耳屋
鍋耳屋（粵拼：Wo1 ji5 uk1）係嶺南建築好樣眼嘅特徵。好似係下面個圖集入面嘅曾大屋咁，佢哋嘅屋頂兩邊度有對形狀好似鍋嘅手柄嘅牆凸咗出嚟－所以嗌做鍋耳屋。響 15 世紀左右（大明時期）開始，鍋耳形嘅牆係有功名嘅人先有得喺屋企度起嘅嘢，而佢哋嘅高低表明咗嗰個人嘅官位。後嚟民間粵人重有咗喺間屋度起鍋耳形嘅牆可以幫自己啲仔同孫做官嘅諗法。但係嗰對鍋耳重有實際嘅功用，例如係起到防火燭同遮太陽嘅作用；後者可以令太陽冇咁容易直接曬住間屋嘅表面，幫手令間屋冇咁熱－呢點喺熱辣辣嘅嶺南地區特別有用。
嶺南園林
嶺南園林（粵拼：Ling5 naam4 jyun4 lam4）係嶺南獨具一格嘅園林設計[3]，當中最有代表性嘅要數廣東嘅「粵中四大名園」－餘蔭山房、佛山梁園、可園、同埋清暉園。
傳統嚟講，嶺南地區山水靚又臨海，有五嶺阻住，環境同北面嘅中原核心地帶好唔同，所以發展咗一套自己嘅風格唔出奇。嶺南地區又熱又成日打風落大雨，所以粵人起園林嗰陣多數會用庭院式佈局－用建築物將個庭園圍住嗮，令到園林入面嘅花草受到保護，打風落大雨嗰時冇咁易畀啲風雨吹爛打爛，而且重可以用呢啲植物嘅陰影幫成笪地降温。地理特徵亦都令到嶺南園林喺規模上面比較細，又唔似得中原嘅園林咁樣畀啲皇家常規制度限住嗮（即係俗語所講嘅「山高皇帝遠」）－佢會揀用木棉樹呢類有本土特色嘅植物同埋用好多木雕同陶瓷呢啲民間工藝品去做裝飾，好似廣州喺廿世紀初起嘅寶墨園就係咁。而且因為佢哋細，好少有山土，所以成日都會「以石為山」－用石頭做假山，例如係餘蔭山房就用咗呢種手法。總體嚟講，呢柞特徵令到嶺南風格嘅園林比較貼近大眾同樸素。
除咗咁之外，嶺南園林喺好多方面見到西歐文化嘅影響。喺理水方面，嶺南園林唔會好似江南園林咁用自然池形水面。佢哋啲水池反而會好似西式園林咁形成規則嘅幾何圖案。再用餘蔭山房嚟做例子，佢由兩個規則形狀嘅水池並列做水庭，環繞八角亭嘅水渠兩邊用園徑同花圃散點山石，重有荔枝同大樹菠蘿呢啲有嶺南特色嘅植物。喺裝飾方面，嶺南園林入面成日都會見到好似係拱形門窗、歐陸式柱頭、或者有色玻璃呢啲西歐風嘅飾物。所以嶺南園林亦都體現咗西人對嶺南文化嘅影響同埋粵文化對外開放嘅特徵。
-
餘蔭山房嘅深柳堂 -
廣東佛山嘅梁園 -
廣東東莞嘅可園 -
寶墨園嘅紫洞舫用咗好多浮雕。
唐樓
除咗呢啲古色古香嘅建築，有西歐風味嘅多層式建築物唐樓（粵拼：Tong4 lau4）亦都係嶺南地區響 19 世紀開始出現嘅建築類型。佢哋主要係起嚟畀平民下舖上居咁樣住，喺好似係香港同埋澳門呢啲畀西歐文化影響得犀利啲嘅地方周圍都見得到。香港啲唐樓多數都有三到四層，每層大約係四米高左右。佢哋初頭多數係用青磚起，而後嚟喺 1930 年代開始變成主要用混凝土。第二次世界大戰之後，香港嘅人口升得好勁，嗰時啲人唔夠屋住，於是乎好多唐樓都畀人攞咗嚟整板間房。通常喺一座唐樓嘅住戶度都會有一戶負責做「包租」，令到港式廣東話入面多咗「包租公」同「包租婆」呢兩個詞語。
唐樓住戶嘅生活喺啲有港澳特色嘅戲同電視劇入面成日都會睇到。
唐朝建築
頭先講到，嶺南文化受大唐同大宋嘅漢文化影響得好犀利。喺 4 至 10 世紀（隋唐時期），有好多中原嘅高僧都會走嚟嶺南度傳佛教，所以令到嶺南有啲有唐朝建築（粵拼：Tong4 ciu4 gin3 zuk1）元素嘅佛寺，好似係廣州嘅光孝寺就係咁。而且自從 19 世紀以嚟，粵港地區重起咗唔少新嘅唐朝建築。呢種建築風格出咗名規模宏大、規劃嚴謹、色調簡潔、主要用木頭做料、又會將藝術性同結構性嘅設計融合埋一齊。例如係香港喺廿世紀初嗰陣時起嘅志蓮淨院，就係攞咗唐朝嘅建築做板起嘅。佢同古典嶺南建築好明顯唔同：佢規模好宏大－會有好多向外揚嘅造型，又會用金同紅呢啲鮮艷嘅顏色（古典嶺南建築係四四方方兼且色水淡嘅）－而且大半都係用木整嘅。呢柞特徵令到成棟嘢望落同日本京都嘅佛寺群（都係用唐朝建築做板嘅）好似[4]。而中國大陸嘅粵廣地區由 1980 年代都開始起呢類建築物，例如係深圳文博館。
-
廣州光孝寺嘅鼓樓 -
光孝寺大雄寶殿嘅東側 -
香港志蓮淨院嘅天王殿 -
志蓮淨院嘅萬佛塔；望落同京都法隆寺嘅五重塔好似。
美術
嶺南嘅人喺漢化咗之後就一路都有搞美術，出咗幾個獨有嘅美術流派。
嶺南畫派
嶺南畫派（粵拼：Ling5 naam4 waa2 paai3）係響 19 世紀尾開始有嘅一個畫畫流派[5][6]。雖然佢歷史唔算係好久遠，但係就好有自己嘅特色。佢係由畀人嗌做「嶺南三傑」嘅高劍父、高奇峰、同陳樹人搞起嘅。呢個流派係建基喺歷史悠久嘅國畫上面，再加埋西人嘅水彩畫風演變出嚟嘅一個風格。呢個風格嘅畫講重留白，而且因為運用咗由西歐引入嚟嘅水彩技術同印象派（Impressionism）思潮，會有一啲好鮮豔嘅顏色同埋用光嘅表達手法，同「蕭條淡薄」嘅國畫起到強烈嘅對比。好似係高劍父畫嘅《東戰場的烈焰》，佢就用咗水彩油嘅鮮紅色嚟代表戰火，再加埋位置上巧妙咁留咗白，令到畫面白色嘅位置似煙又似雲，等睇畫嗰個人有得自由咁去想象幅畫嘅內容。
嶺南書風
嶺南書風（粵拼：Ling5 naam4 syu1 fung1）即係粵人寫書法嘅風格[7]。呢種書風一般都畀評論家形容係「大膽」、「浪漫」、又「有風骨」－都算受人景仰，但係佢嘅歷史都幾多波折：喺公元前南越國啱啱畀漢朝打冧嗰陣，嶺南嘅人已經有喺度寫書法。但係嶺南天氣熱辣辣又濕立立，啲紙兩嘢就又霉又爛，搞到早期嗰啲嶺南書法都冇乜留得到落嚟。打後嗰一千年，雖然話嶺南嘅人有響度刻石碑，而考古學家都揾到啲用墨寫嘅書法，但係重係出唔到特別有料到嘅書法家。要一路去到成 15 世紀，嶺南出咗畀人嗌做白沙先生嘅陳獻章，嶺南先至真係叫做有一套畀人認同嘅書法風格。雖然係咁，嶺南嘅書法家都重係好少可會專攻書法，就連陳獻章佢本人主要嗰份工都係哲學家，而唔係書法家。跟住嗰啲嶺南嘅書法家又多數都係打第二啲工做正職嘅－好似係哲學家、詩人、或者畫家呀咁，得閒先會搞書法。雖然係咁，嶺南都出過有啲朵嘅書法家同書法作品，例如係：
- 陳獻章，1428-1500 年，出身新會，出名寫字嗰陣好好力水；佢曾經用新會圭峰山生出嚟嘅茅草自己整茅龍筆寫書法，而茅龍筆（全名叫「白沙茅龍筆」）家陣已經做咗新會嘅名產。
- 鄺露，1604-1650 年，出身南海，識好多種唔同體嘅書法；佢嘅詩畫作品《袁崇煥督遼餞別圖詩》係佢喺 1628 年送別佢嘅死黨袁崇煥嗰陣畫寫嘅。據講呢幅作品而家收埋咗喺香港。
- 張喬，1615-1633 年，喺廣州出世，出咗名又靚又琴棋書畫乜都識嘅大才女，但係得嗰 19 歲就病死咗；佢留落嚟嘅詩畫才品《南園諸子送黎美周北上詩卷》而家收藏咗喺廣州美術館。
響廿一世紀，廣東嘅粵人開始更加認真咁去研究嶺南書風，睇個勢似係想搞大佢。
嶺南盆景
嶺南盆景（粵拼：Ling5 naam4 pun4 ging2）係嶺南獨有嘅盆栽藝術風格。呢個風格雖然話去到成 1930 年代先有人正式咁承認佢嘅存在，但係佢其實有成千年歷史，有得追溯去到 11 世紀。嗰時嘅中原皇帝宋哲宗將好出名嘅文人蘇東坡眨咗去廣東呢笪「南蠻之地」。雖然係畀人貶咗，但係據講蘇東坡一到步就即刻大讚嶺南山水植物靚（「嶺南萬戶皆春色」），而佢本人係盆栽發燒友，寫咗好多講盆栽嘅詩。睇返紀錄，粵人喺至少 15 世紀（大明時期）開始民間已經有唔少人鍾意整盆栽藝術。而到咗今日，嶺南盆景已經有咗自己獨有嘅一套風格。除咗會用啲有本土特色嘅植物品種之外，佢嘅特色係講求人工同自然嘅配合：例如係嶺南盆景藝術家好多時會好揼心機落去幫棵植物（自然嗰部份）揀返個同佢夾得埋嘅盆（人工嗰部份）；喺處理棵植物啲枝葉嗰陣會好有技巧咁用修剪令到棵嘢跟住個藝術家嘅意願嚟生，生完一輪之後新生出嚟嗰啲枝葉又會啱啱好將修剪嘅痕跡遮住，令到成棵嘢望落好自然。有人話咁就好似嶺南嘅作風－「山高皇帝遠」，粵文化唔會畀啲人工嘢同制度限住。
嶺南盆景藝術喺廣州同香港呢啲嶺南嘅大城市都有唔少人支持，重有好似香港嶺南盆景藝術學會呢類組織喺度搞。
工藝
喺嶺南地區重未漢化嗰時，啲百越人已經喺度整好多唔同嘅雕塑同陶器，而呢啲工藝技術喺漢化咗之後只有變得更加精湛。到咗今日，嶺南嘅各種工藝品已經係去到世界級嘅水平。佢哋嘅產品賣到去全世界好多地方，而且啲產品唔淨只得雕塑：重有刺繡、彩瓷、剪紙、草席、風箏、貼畫、同埋傢俬。當中最出位嘅有幾種：
潮州木雕
潮州木雕（粵拼：Ciu4 zau1 muk6 diu1）係喺嶺南好出名嘅工藝。佢係由屬於閩系嘅潮州人搞起嘅，而家吓連粵人都喺度搞。呢種工藝歷史好悠久：喺 11 世紀嗰陣大宋已經有文獻記載呢種工藝，而且有錢人家唔少都鍾意買嚟裝飾自己屋企。去到 16 世紀尾，呢種工藝開始喺民間度普及起上嚟，好多祠堂同廟都會揾金漆潮州木雕做裝飾，重有好多嶺南以外嘅地方嘅人幫襯。金漆木雕通常會揾啲實淨得嚟又堅韌嘅木頭（好似係樟木、杉木、柚木呀咁）嚟做料，畫完幅草圖之後就由大到細咁去將舊木頭雕做想要嘅樣，成咗形之後至跟手上金漆。
廣州玉雕
廣州玉雕（粵拼：Gwong2 zau1 juk6 diu1）係粵廣地區嘅民間玉雕工藝。佢有成過二千年歷史－考古學家喺南越王墓發現咗百越人整嘅玉雕[8]。而響漢化之後，嶺南嘅人有學整大唐嘅玉雕祭祀神器，重繼承咗大宋嘅七巧色玉技藝。今日嘅廣州玉雕主要用啲嶺南周圍嘅玉材，好似係呈草綠色嘅南方玉咁。呢種風格嘅玉雕出咗名「莊重」、「輕盈」得嚟又「玲瓏剔透」。而且粵人重發明咗一種叫「留色」嘅特技，雕嗰陣會保留住原本嗰舊玉嘅天然色水，鑿出一啲色彩鮮艷得嚟又自然嘅作品。喺兩廣地區，廣州玉雕最常係用嚟整首飾同埋擺設。粵人重成功整到「玉球」─一種入面有十幾廿層，用玉造嘅波─呢種特殊嘅工藝品。
廣州牙雕
廣州牙雕（粵拼：Gwong2 zau1 ngaa4 diu1），又叫做南派牙雕，係另一樣嶺南地區好有朵嘅工藝品。佢係一種有超過兩千年歷史嘅工藝技術。呢種工藝起源喺秦漢時代嗰陣嘅中原地區，後嚟傳咗去嶺南地區。後尾粵人重發展咗一套自己嘅風格。呢種雕塑係攞象牙做料，佢用咗大笨象身上最硬嗰部份嚟整出一啲好似玉咁通透但係又硬淨嘅雕塑，而喺氣候温和嘅嶺南地區，廣州人重有咗出名精細得嚟又唔會脆嘅「廣州牙雕」，甚至重叻到成功整出咗畀人嗌做「鬼工」嘅工藝品－象牙波。
雖然話牙雕工藝的確係好勁，但係自從喺 1980 年代開始，大笨象畀想攞象牙嘅人係咁捕殺，搞到世界好多地方嘅人都開始覺得用象牙整嘢唔係咁好。國際社會度重話咁快立咗法，唔畀人買賣象牙或者係用象牙做料整嘢。於是乎而家嘅粵人就開始咗去揾一啲代替品－質地似象牙但又唔係象牙嘅料－嚟去傳承呢種古老嘅工藝。
粵繡
粵繡（粵拼：Jyut6 sau3）係粵廣地區嘅刺繡工藝，喺廣州、佛山、番禺、順德、東莞、以至台山呢啲地方都有一定嘅支持度[9]。呢種工藝有成千年歷史，最早可以追溯到去公元 9 世紀。嗰陣嶺南地方漢越共處，畀當時控制住中原嘅大唐統治緊，相傳話唐順宗手下就有一個嚟自南海嘅 14 歲女仔，佢喺刺繡方面嘅技術犀利到可以完美咁將《法華經》刺出嚟，啲字重要係得「粟粒」咁大。嗰陣時之後，嶺南嘅民間就有整刺繡工藝，重出埋自己嘅風格。喺 16 世紀有講到葡萄牙嘅生意人喺嶺南將粵繡買咗返去送畀自己嘅國王，重要畀國王讚。喺跟住嗰幾百年，粵繡就一路發展一路賣畀世界好多地方嘅人，做咗喺歐洲嘅貴族同有錢人之間好多人鍾意嘅東方飾物之一。
除咗有自己獨特嘅一套針法技巧，粵繡亦都有顯眼啲嘅特徵：佢一般嚟講遠睇都好樣眼，近睇就好精細，紋理清晰，畫面多嘢得嚟又唔會覺得亂糟糟，而且色水好鮮艷。喺嶺南地區，粵繡有得純用嚟做裝飾，但係又有用嚟做生活用品或者係做大戲嘅戲服呢啲實際啲嘅用途。
廣彩
.jpg)
廣彩（粵拼：Gwong2 coi2），全名叫做廣州織金彩瓷，係一種喺白色瓷器上面加彩繪燒出嚟嘅工藝品。佢出咗名色彩絢爛，畫工又精細。呢種工藝開頭係喺 16 世紀尾嘅大明時期，當時啲粵人由江西景德鎮嗰度運啲白瓷過嚟，再喺廣州嗰度幫啲瓷器油顏色、加圖案、再燒製。喺佢身上睇得到明朝文化嘅影，但係又加咗啲西人嘅風格喺入面，例如係《竹園陶說》就咁樣講：「清代中葉，海舶雲集，商務聚盛，歐土重華瓷，我國商人投其所好，乃於景德鎮燒造白瓷，運至粵垣，加僱工匠，仿照西洋畫法，加以彩繪，於珠江之河南，開爐烘染，製成彩瓷然後售之西商。」
廣彩後嚟重擴展咗去嶺南嘅其他大城市，例如香港就喺 1930 年代開始學廣州咁搞廣彩。香港人開咗好幾間廠整廣彩，啲成品重出口去到美國、西歐國家、南美、東南亞、大溪地、同馬達加斯加呢啲地方。到咗廿一世紀，香港嘅廣彩業因為大陸嘅粵廣地區開始識整廣彩而開始冇乜點再搞，但係都重有啲瓷藝發燒友喺嗰度嘗試緊將呢種工藝搞落去[10]。
-
廣彩花鳥瓷盤 -
廣彩村姑採櫻圖碟 -
廣彩蓋罐
廣式傢俬
廣式傢俬（粵拼：Gwong2 sik1 gaa1 si1）係嶺南獨有嘅整傢俬風格。佢喺大明時期嗰時發源，係運用咗嶺南嘅本土木材、唐宋時代嘅漢人傢俬、再加啲西歐藝術風而整出嚟嘅一種新風格。佢嘅用料主要係紫檀木、黃花梨、酸枝木、同雞翅木呢類木材，通常每件傢俬都係用一舊大嘅木頭一嘢過鑿出嚟，令到每件廣式傢俬都淨係有一種木，而且好少可會有接駁嘅痕跡。呢種傢俬重會有啲西方傢俬嘅曲線同埋大面積高浮雕，借咗啲西人嘅巴洛克（Baroque）式同洛可可（Rococo）式花紋，又會有啲好似潮州木雕咁嘅粵式圖案雕刻，同埋鍾意鑲好多啲好似係貝殼、雲石、陶瓷、琺瑯、或者玻璃畫呢類嘅裝飾物上去，形成咗唐西合璧。到咗廿一世紀，廣式傢俬已經做咗嶺南嘅其中一樣特產，其他華人同外國人都會幫襯。
剪紙
剪紙（粵拼：Zin2 zi2）係另一樣喺嶺南好多人整嘅工藝，尤其係佛山搞得零舍叻[11]。呢種工藝喺大宋時期尾嗰陣開始有。佢本來只係用嚟做大節日嗰陣用嘅裝飾，後嚟啲人開始拎去賣，令到佢變咗做一種有商業價值嘅工藝品，喺窗花以至鞋花呢啲地方都會有人用。佛山剪紙嘅題材多數係啲平民化嘅嘢，包括神話、動物、吉祥圖案、或者係嶺南風土呀咁，色水好多變，主要係鮮艷嘅紅色，但係就連比較清淡嘅灰同綠都會有。大時大節嗰陣，粵人上下都會用好多唔同大細嘅鮮艷剪紙做裝飾，好有節日氣紛。
高州角雕
高州角雕（粵拼：Gou1 zau1 gok3 diu1）係嶺南喺 1960 年代開始有嘅工藝品。佢一開頭就好受歡迎，賣到去港澳同日本，甚至乎係包埋英國在內嘅廿九個國家同地區。佢係用各種水牛或者係山羊嘅角做料嚟作雕塑，有啲會將隻角切做細絲或者薄片，整出好多唔同嘅樣。
交趾陶
交趾陶（粵拼：Gaau1 zi2 tou4）係一種喺廣東起源嘅低溫彩釉軟陶工藝，成日都會用嚟整啲公仔或者雕像喺廟宇度做裝飾。呢種工藝家吓喺兩廣地區已經唔多見得到。但係佢喺 19 世紀傳咗去台灣，而台灣人亦都重喺度傳承緊呢種工藝。
演藝
既然嶺南地區講嘅話咁獨特又咁有歷史，呢一帶啲人唱嗰啲歌仔自然都會有獨到嘅風格。自從幾個世紀之前開始，嶺南地區已經有咗好多唔同嘅戲曲，好似係大戲、廣東漢劇、同埋採茶戲呀咁。當中大戲個勢最勁，有好多海外嘅粵僑都鍾意聽，有時甚至乎連粵僑以外嘅華僑都聽埋一份。廣東話同台山話都有自己嘅一套民歌，當中《南海潮》好多人都覺得係嶺南嘅象徵。嶺南演藝重唔止有呢啲比較古老傳統嘅嘢：由廿世紀中期開始，香港出咗好多用廣東話嚟表達嘅流行歌同戲。呢啲歌甚至連喺西方世界都有人捧場。總體嚟講，嶺南嘅演藝可以話係極之豐富多元。
大戲
大戲（粵拼：Daai6 hei3），正式啲嗌做粵劇（粵拼：Jyut6 kek6），可以話係廣東話傳統演藝嘅代表。佢知名度高到畀人列咗入世界非物質文化遺產名錄。大戲起源最遲係喺 16 世紀頭，但係有好多歷史學家話佢可以追溯到成 13 世紀尾嘅南宋時期：嗰時嘅中原戲曲跟住向南走難嘅漢人一齊落咗嚟，後嚟再受西歐音樂形響咗而變成今日嘅大戲。到咗今日，大戲已經進化咗做一種結合咗唱做念打、音樂、同埋戲服嘅舞台藝術。簡單啲講，大戲嘅技巧包括咗：「唱」－指「唱功」，係講緊個大戲演員要識唔同嘅唱腔，重要配合自己演緊嗰個角色去揀返個啱嘅唱腔；「做」係指「做功」，要配合自己個角色嚟去表演，好似係手勢、臺步、走位、同抽象表演呢啲功架；「念」係指「念白」，要識得透過好好控制講對白嘅語氣同神情嚟去表達自己演緊嗰個人物；「打」係指「武打」，即係要喺講打交嗰啲橋段嗰陣做舞水袖、揈水髮、玩扇、或者係耍棍呢類大動作。
配樂
喺音樂方面，大戲會用成四廿幾種唔同樂器去搞配樂。呢柞樂器好多都係東方人普遍都會用嘅，好似係古箏或者琵琶呀咁。之但係呢柞樂器有啲都會有地方特色，例如係大戲用嘅梆子有分大中細，而且係空心長方形，叫做「南梆子」，唔似得北方咁用淨係得一種大細嘅實心梆子。自從喺 19 世紀開始，大戲重開始咗採用啲西人嘅樂器，好似係小提琴咁。
行當
大戲嘅行當（指演員個造型）有三部份：化妝、戲服、同頭飾。大戲演員嘅化妝通常係白底，會畫到對眉長一長重向上翹嚟表示威嚴，再喺白底上面加第啲色，而加咩嘢色喺舊時嗰陣就睇佢演啲乜嘢人物－紅色代表血性忠勇，黑色代表剛耿忠直，白色代表奸惡陰險呀咁。大戲戲服早期嗰陣係用明朝嘅衫做板嘅，跟住嗰幾百年嘅大清時期畀京劇影響咗，開始用大清嘅衫。除咗呢啲嘢，頭飾亦係大戲演員一個好樣眼嘅特徵，女角會有好多簪、釵、梅花石、耳邊花、鳳冠呢類有傳統女性味嘅做裝飾，而男角嘅頭飾就偏向用嚟表達佢哋嘅職業，好似係太子盔、紥巾、帥盔、駙馬盔呢啲。
-
大戲花旦嘅造型 -
《帝女花》用嘅頭飾 -
大戲用嘅梆子
民歌
嶺南嘅民歌（粵拼：Man4 go1）都好多樣化[12]。由公元前嘅百越時期嗰陣，啲平民已經喺度作歌唱歌。到咗今日，嶺南地區已經有好多種唔同民歌。淨係講廣東話民歌就已經至少有珠三角嘅鹹水歌、跳禾樓祭祀唱嘅賣雞調、興婚禮嗰陣唱嘅高棠歌、畀湘贛地區影響咗嘅粵北民歌、廣州同東莞嗰帶興嘅粵調（分做粵謳、板眼、南音、木魚歌、同龍舟歌五種）、用台山話唱嘅台山民歌、同埋好多嘅兒歌（好似係好多粵人細個都唱過嘅《小蜜蜂》）。當中嘅賣雞調就有研究民族音樂嘅學者話佢有得追溯到去百越時期：賣雞調傳統係喺祭靈雞嗰陣唱嘅，而呢種祭祀係由古百越族稻作文化嘅拜雀圖騰演變出嚟嘅，所以講得上係文化上嘅活化石。呢啲類型嘅民歌喺嶺南地區都重有好多粵人唱同周圍廣播。除咗廣東話民歌，嶺南地區亦都有喺潮汕地區用潮州話唱嘅粵東漁歌，同埋用客家話唱嘅客家山歌。
一講起廣東話民歌一定會提嘅《南海潮》（粵拼：Naam4 hoi2 ciu4）嘅歌詞，用唐字同粵拼寫分別係：
- 紅霞滿灑粵天東破曉，
- 蒸蒸日上序華章，
- 紅棉紫荊又添千百朶，
- 欣欣萬世象。
- 我見江潮依然推起那舢板，
- 卻是穿過玉宇瓊樓新靚景，
- 我叫海潮波濤不要這洶湧，
- 隔住一片萬里大洋歸心切。
粵拼：
- Hung4 haa4 mun5 saa2 jyut6 tin1 dong1 po3 hiu2,
- Zing1 zing1 jat6 soeng5 zeoi6 waa4 zoeng1,
- Hung4 min4 zi2 ging1 jau6 tim1 cin1 baak3 do3,
- Jan1 jan1 maan6 sai3 zoeng6.
- Ngo5 gin3 gong1 ciu4 ji1 jin4 teoi1 hei2 naa5 saan1 baan2,
- Koek3 si6 cyun1 gwo3 juk6 jyu5 king4 lau4 san1 leng3 ging2,
- Ngo5 giu3 hoi2 ciu4 bo1 tou4 bat1 jiu3 ze5 hung1 jung2,
- Gaak3 zyu6 jat1 pin3 maan6 lei5 daai6 joeng4 gwai1 sam1 cit3.
嶺南民歌試聽：
粵語流行曲
喺廿世紀中期開始，英屬香港喺好多地方都發展得好快，香港人整咗好多戲同電視劇，入面啲歌都係用廣東話嚟唱嘅。但係真係要數專係用廣東話嚟唱歌就要去到 1970 至 80 年代。嗰時香港出咗鄭君綿、鄧寄塵、周聰、陳寶珠、蕭芳芳呢柞歌手。佢哋唱嘅粵語流行曲（粵拼：Jyut6 jyu5 lau4 hang4 kuk1）題材好多樣－有講情情塌塌嘅，又有啲講友情嘅。而且呢啲歌全世界都好多人聽，賣到去成個遠東地區－包括咗日本、韓國、臺灣、同東南亞－甚至乎係去到西方世界。英文度重開始有咗個詞，專係指粵語流行曲嘅－「Canto-pop」，又或者叫做「HK-pop」。呢啲歌令到廣東話做咗普通話以外最多人知嘅唐話。但係由 1990 年代尾開始，HK-pop 喺個市場度開始唔夠 J-pop （日本）同 K-pop （韓國）砌，到咗家陣都重係未見到乜嘢起色。
港產片
港產片（粵拼：Gong2 caan2 pin3）即係香港人做導演拍嘅戲。呢柞戲多數都係用廣東話嘅，但係都有啲國語片。香港喺廿世紀初頭已經有喺度整啲默片，但係嗰時啲港產片質素唔高，好少可話賣到去外國。要去到成廿世紀中後期，香港出咗李小龍、許冠傑、同周星馳呢柞出名嘅演員港產片先至正式上到去國際舞台。嗰時港產片連西方都有人睇，但係佢個勢同粵語流行曲一樣：由 1990 年代尾開始，港產片喺國際市場度嘅競爭力開始下滑，而家重未有回升嘅跡象。
香港動畫
由 1970 年代開始，香港人開始興睇公仔書。初頭好多時都係用打打殺殺嘅武俠或者黑社會做題材，但係好快就出現咗其他類型－例如係鬼故或者綜合型－嘅漫畫。冇幾耐香港人重開始畫卡通整動畫。因為日本動漫喺粵港地區嘅後生仔後生女之間好有人氣，加上佢哋又好多時會請日本啲公司幫手畫，所以香港嘅動漫風格自然係畀日本影響咗。但係佢哋都有自己嘅特色，好似係題材好多時會揀一啲比較貼近社會生活嘅，例如係偏好描寫香港人（以至粵人）嘅日常生活。
麥兜
喺呢柞動漫作品入面，香港人作嘅麥兜（粵拼：Mak6 dau1）卡通人氣零舍高。除咗嶺南地區，喺成個東北亞都有人收睇，令到佢做咗香港動漫嘅代表人物。而且因為呢個系列嘅故仔裏面成日有講到某啲粵人獨有嘅傳統節日習俗同見到有嶺南特色嘅建築物，亦都令到呢套動畫間接咁幫手宣傳咗嶺南同香港嘅傳統文化。
文學
嶺南地區有自己一套文學風格。好似係詩（粵拼：Si1）咁，詩呢家嘢好講語言嘅音韻。嶺南有咁多獨特嘅話，就當然會有自己一套詩詞。而廣東話喺詩詞方面嘅歷史好悠久，佢係唐宋漢人講嘅語言－「中古漢語」－嘅直系後裔，有成千年歷史，有好多大唐同大宋時期嘅詩詞都係要用廣東話嚟讀先至會好聽。而嶺南東部地區好多人用嘅客家話同潮州話度都重見到好多上古漢語－重古老過中古漢語嘅唐話－嘅影。總括講句，嶺南地區嘅文學文化可以話係源遠流長。
中古詩詞
唐詩（粵拼：Tong4 si1）同宋詞（粵拼：Sung3 ci4）公認咗係古華夏史上最出色嘅詩詞作品之一。而今日嘅嶺南就保留咗最啱用嚟讀唐詩宋詞嘅話－廣東話。現代廣東話係現存咁多種唐話入面最近中古漢語嘅，讀起中古時代嘅唐詩宋詞上嚟重好押韻。相反，普通話係喺好近代先至出現嘅語言：由 12 世紀嘅宋朝時期後半橛開始，中原地帶（北方）畀胡人大規模咁侵略，搞到北方嘅語言同文化喺好多方面都胡化咗。今日嘅普通話啲砌句子方式雖然重係似唐話，但係佢啲發音同埋用字就畀滿清嘅滿州話影響得好犀利，例如係喺中古漢語入面成日都聽到嘅入聲－即係用 p 、 m 、 k 做尾嘅音－喺普通話入面都唔見咗，搞到用普通話嚟讀唐詩宋詞好多時都押唔到韻。相反，因為嶺南地區離胡人好遠，好似係廣東話、客家話、同潮州話呢啲嶺南地區嘅唐話就保留咗呢啲音。
唔單止係咁，嶺南嘅人喺超過一千年前開始已經喺度作詩作詞。大唐其中一個最有料到嘅大詩人張九齡（678-740 年）就係嶺南出身嘅－佢喺韶州曲江（今日嘅廣東韶關）出世。張九齡係嗰時嘅廣州都督個仔。據講佢好細個嗰陣已經好醒目，後尾重坐埋宰相個位。佢一世人寫咗好多詩，當中佢嗰十二首《感遇》，畀人列咗喺《唐詩三百首》嘅開頭。繼張九齡之後，後嚟嶺南喺 9 世紀嘅唐朝尾又出咗個朵冇張九齡咁大，但係都叫有啲名氣嘅邵謁同陳陶。當中邵謁出咗名寫起詩上嚟唔用花巧修辭，好樸素。好似係佢寫嘅《歲豐》：
- 邵謁《歲豐》
- 皇天降豐年本憂貧士食。
- 貧士無良疇安能得稼牆？
- 工傭輸富家日落長太息。
- 為供豪者糧役盡匹夫力。
- 天地莫施恩施恩強者得。
自從嗰時開始，粵人就一路都有寫詩詞，出咗唔少有影響力嘅詩人，而且重有咗嗰名叫「嶺南詩派」（粵拼：Ling5 naam4 si1 paai3）－出嗮名睇重保留唐朝發音，又會揾啲有關地區風土嘅題材寫詩，保留到大唐嘅遺風得嚟又有本土特色。除咗呢樣，民間嘅文人雅士得閒都會寫吓詩詞嚟開心吓，或者係喺有啲乜嘢大事嗰陣作返對對聯嚟賀吓佢或者紀念吓，例如係喺大家族嘅祠堂嘅門口度好多都會寫對對聯嚟畀人睇吓佢哋幾有文化。
近代詩詞
嶺南三家
嚟到摩登時代，嶺南喺 17 世紀嘅時候出咗現實主義嘅嶺南三家（粵拼：Ling5 naam4 saam1 gaa1）－屈大均、陳恭尹、同梁佩蘭呢三個詩人。佢哋好多時都係寫詩去歌頌反抗滿清嘅明朝將領或者係描繪當時嘅平民畀清政府壓榨得有幾慘。好似係屈大均喺廿八歲北上去旅行嗰陣有感而發寫嘅《魯連台》，就會令讀嗰個人覺得個景有啲悽涼：
- 屈大均《魯連台》
- 一笑無秦帝，飄然歸海東。
- 誰能排大難，不屑計奇功。
- 古廟千秋月，荒臺萬木風。
- 從來天下士，只在布衣中。
口語粵詩
嶺南詩派出咗名革新。除咗呢啲古雅啲嘅作品，再近期啲嘅嶺南詩人重好夠膽去搞新諗頭－喺 19 世紀，嶺南開始有詩人用口語化嘅廣東話嚟去寫詩[13]。當中最有代表性嘅應該要數廣東惠陽出身嘅廖恩燾（1863-1954 年）。佢嘅作品《嬉笑集》[14]裏面嘅詩就好明顯睇得出係用咗口語化嘅廣東話，一啲都唔會畀人有文鄒鄒嘅感覺。好似係佢寫嘅《秦始皇》就好通俗大眾：
- 廖恩燾《秦始皇》
- 荊軻嚇失佢三魂，好在良官冇搬親。
- 野仔執番條爛命，龜公害盡幾多人。
- 監生點解嚟陪葬，臨死唔知仲拜神。
- 萬里咁長城一座，後來番鬼當新聞。
- 六國吞埋擸吓鬚，安心就咁著龍袍。
- 收齊爛鐵燒銅像，堆起新書透火爐。
- 過海點嚟求味藥，當天仲去貼張符。
- 既然慌到江山冧，生仔唔該叫阿胡。
粵詩文獻
有好多證據都顯示嶺南嘅詩其實唔淨止得呢啲。而家喺廣東有人響度搞緊一個叫做《全粵詩》（粵拼：Cyun4 jyut6 si1）嘅文獻，諗住想記錄嗮自古以嚟所有嘅粵詩，已經出咗三十冊，收錄嗮大明時期同打前嗰啲粵詩。佢哋係遇到啲阻滯，但係而家重係有喺度進展緊。
香港文學
香港文學（粵拼：Hoeng1 gong2 man4 hok6）係由廿世紀開始喺政治經濟環境特殊嘅香港產生出嚟嘅文學文化。香港話就話畀人嗌做「文化沙漠」，但係查實香港人寫嘅文學喺唐文世界以至成個國際社會都有啲地位。啱啱開頭嗰陣，香港文學主要係由啲喺廣東或者佢周圍地區走難落嚟嘅文人寫嘅。佢哋都係喺一個中原地區打仗打到七國咁亂又畀外國人哈嘅時代大嘅，所以佢哋寫啲嘢好多時都係喺度呻自己要屈喺香港呢笪「南蠻之地」，或者係講吓自己嘅愛國情懷。但係響廿世期中期嗰陣，香港進步得好快，啲文人就開始會諗去寫一啲有香港本土特色嘅嘢，好似係馬朗寫嘅《太陽下的街》，就用咗 1956 年嘅九龍暴動做背景。因為嗰時嘅香港同其他亞洲地區比起上嚟叫做自由開放啲，香港人諗嘢寫嘢可以冇乜顧忌，加上同西人交流得多，出咗兩派思潮－主張要跟美國學嘢同用美國人風格寫嘢嘅「綠背文化」同埋反對呢種諗法嘅「左派」。再打後啲嗰幾廿年，香港嘅作家喺呢種自由嘅風氣之下同嗰時飛躍緊嘅香港電影電視業一齊搞嘢，將佢哋寫嘅其中一啲故仔拍做戲或者電視劇，出咗柞有睇頭嘅作家[15]。
睇體裁嘅話，香港文學嘅特色係鍾意搵現實做主題，佢哋啲題材好貼近社會同生活，戀愛故仔同埋係講社會生活嘅散文普遍都受歡迎－好似係人氣作家張小嫻同陶傑呀咁。但係香港都有出過第啲體裁嘅作家，好似係寫武俠嘅金庸同古龍，重有係寫科幻嘅倪匡。而喺近呢幾年，香港開始興網上小說，喺後生之間好有人氣，開始有唔少後生作家搞，令到佢做咗 80 同 90 後嗰代香港文學嘅新興勢力。總體嚟講，要數香港文學嘅主要作家嘅話有：
- 張小嫻，寫言情同散文；出名嘅作品包括《麵包樹》系列同《都會愛情》系列。
- 陶傑，出咗名推崇歐美文化；佢主要寫啲講文化嘅嘢，好似係喺報紙雜誌度寫啲討論西人文化嘅文。
- 金庸，主打武俠；佢出咗《天龍八部》同《神鵰俠侶》。
- 古龍，都係打武俠；佢嘅代表作有《楚留香傳奇》同《小李飛刀系列》。
- 倪匡，主打科幻；佢係好出名嘅《衛斯理》系列同《原振俠》系列嘅作者。
粵文文學
雖然話香港有唔少有本事嘅作家，但係用自己嘅白話寫文學都重係少見。喺呢方面，成個嶺南地區同其他東北亞地區－包埋韓國同越南－好似，傳統嚟講「語」同「文」係分開嘅：講嘢用各自嘅本土白話，寫嘢就用文言文。要喺成 19 世紀尾，呢一頭先開始有人正式咁用白話化啲嘅文字嚟寫文學。之不過，大中華地區都重係離唔開用中文書面語－而中文書面語係攞普通話做板嘅，唔算係嶺南地區嘅白話。呢一樣嘢香港都走唔甩。頭先提咗嘅作家寫嘢冚唪唥都係用中文書面語，而唔係用粵文。但係喺廿一世紀開始有人主張用粵文嚟寫文學[16]。
飲食文化
飲飲食食係人生存落去一定要做嘅嘢，所以佢係一種包含嗮科技、自然、同人文嘅文化遺產。嶺南唔單止有獨特嘅地理環境，而且重成日同外界嘅人做嘢，會發展咗自己一套嘅飲食文化一啲都唔出奇。嶺南地區背住座山，對住個海，有成 3368 公里長嘅海岸線，天氣又暖又濕立立，成日都出太陽－無論係捉魚定係種菜都會好好收成。咁好天然條件，嶺南嘅人就有得用好多唔同嘅食材嚟煮嘢食，好似係屈大均（17 世紀）嘅《廣東新語》就有咁講：「天下所有食貨，粵東幾盡有之，粵東所有之食貨，天下未必盡也。」呢啲文化重有得追溯到去好耐之前嘅百越時期：喺超過一千年前，自從喺南越國冧咗之後，有唔少漢人都會去嶺南地區做官或者長住，佢哋唔止將嗰時嘅中原飲食文化帶咗去嶺南，寫嘢嗰陣重會跟手提吓嶺南嘅本土飲食風俗。好似係響 9 世紀幫唐昭宗做司馬嘅劉恂咁，佢喺嶺南度做咗一輪嘢，寫咗《嶺表錄異》嚟記錄嗰一帶嘅風土人情。呢本嘢入面有講到當地人嘅飲食習慣，提咗佢哋鍾意食「蠔蠣」同「水牛肉」呀咁。
廣東菜
廣東菜（粵拼：Gwong2 dung1 coi3），又叫做廣州菜（粵拼：Gwong2 zau1 coi3），正式啲嗌做粵菜（粵拼：Jyut6 coi3），係指廣東同港澳一帶嘅粵人獨有嘅傳統餸菜同埋煮餸方法。根據歷史學家研究，廣東菜係喺 10 至 13 世紀嘅南宋時期大致上有咗今日見到嘅樣嘅。嗰時漢人移民潮正值高峰。呢班漢人入面有御廚，佢哋就將嗰時中原嘅煮嘢食技巧帶埋去嶺南，跟手就同百越族嘅固有飲食文化融合埋一齊。打後嶺南做明朝嘅港口嗰陣成日都同西人或者東南亞人交流，令到廣東菜又進化咗少少。今日嘅廣東菜已經好多姿多彩。佢成個食譜好長，喺 1965 年嘅「廣州名菜美點展覽會」就數到有成 5457 種餸菜咁多。而且廣東菜好多人都覺得好好食，畀中國封咗做佢八大菜系之一。廣東菜甚至喺國際社會都有啲地位：粵人喺近期歷史度好多次大規模咁移民去外國，令到廣東菜做咗世界上其中一種最多人識嘅美食。
廣東菜有幾個特別嘅地方。首先，佢喺用料方面好開放，雖然佢話就話主要係用豬肉、牛肉、禽肉、同水產，但係查實佢無論係魚蝦蟹定係各種飛禽走獸（甚至乎係昆蟲）都有機會用－幾乎乜都可以攞嚟煮餸。所以粵人嘅飲色文化入面重有咗「野味」呢個詞語，專係用嚟形容一啲另類啲嘅食材，好似係蛇、老鼠、狸貓呀咁。喺口味方面，廣東菜嘅口味主要係「清鮮嫩爽」，除咗「甜酸苦辣鹹」之外重會講求「鮮」。調味嗰陣睇重配合食材原本嘅味嚟煮，唔鍾意太辣嘅嘢，亦都偏好落少啲香料－呢幾樣嘢令到佢同四川菜形成到好強烈嘅對比。廣東菜入面嘅餸菜多數都淨係會落少少薑、蔥、糖、鹽、豉油、米酒、澱粉、油、八角、或者肉豆蔻嚟去調味，間唔中或者會加啲五香粉同白胡椒粉，淨係煮內臟嗰陣會係咁咦落重啲蒜頭呢類香料。佢哋為咗保留食材原本嘅味道，好興用清蒸。所以廣東菜啲味一般都唔會好濃。喺烹調方面，廣東菜有成廿一種烹調方法咁多，除咗頭先提咗嘅清蒸，廣東菜重好叻用炒、煎、焗、燜、炸、煲、炖、同扣呢啲方法。佢哋煮嘢好講究火侯、鑊氣、同埋「即炒即食」，會要求整出嚟嘅餸菜有齊「色香味形」。
出名餸菜
老火湯
老火湯（粵拼：Lou5 fo2 tong1），俗啲嗌做「老火靚湯」，係廣東菜嘅特色。因為嶺南天氣又熱又濕，令到粵人傳統嚟講都鍾意飲多啲湯水嚟補吓身－喺傳統廣東菜入面，湯水嘅比例通常都比較高。而老火湯呢家嘢就係粵人喺近呢二三百年開始興煲嘅。據講喺 18 世紀嗰陣時，廣東地區唔係好開發到煤炭，搞到廣東人唔理係煮嘢食定係煉鐵都要齋用柴嚟生火。於是廣東人就焗住慳住啲咁去用火，響煮餸嗰陣唔敢大炒大煎，改做用慢火煲湯煲粥－就出咗老火湯呢味嘢。老火湯通常係攞個煲將啲菜、肉、生果、或者藥材熬成幾粒鐘整出嚟，好有營養，重有護膚、護心、明目、降膽同健骨嘅效用。今日嘅粵人成日都會煲老火湯嚟飲。
飲茶文化
粵人出嗮名鍾意飲茶（粵拼：Jam2 caa4）。響嶺南地區，飲茶係一種飲食文化，但同時亦都係一種民俗文化：粵式茶樓唔單止有自己一套嘅飲食風格，飲茶同時重係粵人嘅一種傳統禮節。粵人喺有客人嚟探自己嗰陣，好多時候第一樣要做嘅就係「奉上一杯靚茶」，而「請飲茶」基本上就係佢哋表示熱情嘅方式。粵人嘅飲茶文化重有一柞專屬嘅詞語，好似係「搭檯」、「茶友」呀咁－已經係一種次文化。
傳統嚟講，粵人無論朝頭早、晏晝、定係夜晚都可以去飲茶。飲早茶通常係老人家多，佢哋好多時喺朝早五點零六點晨運完之後就會成班茶友一齊去茶樓度揾張檯坐埋一圍，一路飲茶一路食點心一路傾閒偈。稍為晏少少嘅九點幾時段，有唔少後生仔後生女就會陪自己嘅阿爺阿嫲飲茶。下午茶嗰陣啲嘢食同做法同早茶差唔多，但係就比較多係成家人一齊飲。而夜晚嗰陣嘅茶樓通常會有雅座同包廂－好多時就會有啲大型啲嘅聚會，呢個時候啲人嗌嘅嘢食亦都會偏向豪華啲。但係無論係邊種飲茶，開頭嗰陣要做嘅嘢都係「開茶」－揾張檯坐低，揀自己想飲啲乜嘢茶，再叫個伙記「沖茶」，茶嚟咗之後就會嗌點心，成班人重會一路飲飲食食一路傾閒偈，最後食完就埋單。
點心
點心（粵拼：Dim2 sam1）係粵人飲茶嗰陣一定會有嘅嘢食。「點心」呢個詞語最早喺 11 世紀出現。《唐書》入面就有咁樣講：「唐鄭為江淮留侯，家人備夫人晨僎，夫人謂其第曰：治妝未畢，我未及餐，爾且可點心。」呢句嘢嘅意思係話一家人準備食早餐，重未開飯，女主人同佢細佬講話佢重未梳好妝，叫佢等一陣，食住啲小食醫肚先。而點心呢類嘅食物歷史好悠久，早喺公元前 500 年中原地區已經有記載民間有啲類似嘅小食，後嚟再傳咗去嶺南同慢慢咁演變做今日嘅點心。粵式點心好多時係用蒸籠嚟上嘅。佢哋有好多種，可以細分做蒸點、炸點、包、腸粉呀咁。點心係粵式飲食文化不可或缺嘅一個組成部份－廣東同香港呢啲地方都有廚藝學校會開班專係訓練點心師傅。
涼茶
涼茶（粵拼：Loeng4 caa4）係嶺南獨有嘅一種嘢飲。嶺南地區又熱又濕，而且粵人又鍾意食埋嗮啲煎炸嘢，搞到佢哋成日都話咁易就熱氣。於是民間就興起咗用啲藥性寒涼又消暑嘅草藥煲水，然後再攤凍嚟飲－呢啲清涼又有補身效用嘅嘢飲就係涼茶。涼茶有好多唔同款，比較多人識嘅有廿四味、五花茶、雪梨茶、感冒茶、同埋火麻仁呀咁。佢哋喺嶺南地區好有人氣。廣州同埋港澳地方都開咗好多專係賣涼茶嘅涼茶舖，無論大人定係細路都有人幫襯。呢三個地方嘅政府甚至重喺 2006 年成功咁爭取令到中國國務院將涼茶列做國家級非物質文化遺產。
糖水
糖水（粵拼：Tong4 seoi2）係嶺南飲食嘅其中一個特色，泛指一啲液態嘅粵式甜品。糖水嘅歷史源頭而家已經查唔到，但係廣州嗰一帶似乎係喺重未漢化嗰陣已經有啲類似糖水嘅嘢，而 10 至 13 世紀嘅南宋時期亦都有文獻提過佢吔嘅市集有賣一啲叫做「涼水」嘅甜味嘢飲。同中原地帶嘅甜湯比起上嚟，糖水一般都會杰啲，所以粵人通常都會講「食糖水」而唔係「飲糖水」。響嶺南地區，糖水有好多款，通常係用嚟喺晚餐做飯後甜品或者做消夜。佢哋熱食或者凍食都得，而且粵人食糖水重會睇時令：夏天會食綠豆沙清熱，而冬天會食芝麻糊。喺嶺南地區，除咗用嚟食，糖水重有喺傳統習俗入面擔當一啲角色：廣東人喺結婚新郎新婚拜完天地之後就會坐喺床邊，等主婚人請好命婆將親友送嚟房度嘅紅綠筷子撒向帳前帳頂度，跟手個好命婆就會捧住蓮子羹餵新郎新婚食，有「連生貴子」咁嘅意思。
酒文化
嶺南嘅酒文化好耐歷史。考古學家發現喺新石器時代嗰陣，嶺南地區嘅人已經有整生果酒，而南越國嘅遺物當中亦都揾到有用嚟裝酒嘅容器。後嚟喺 11 世紀嘅宋朝時期，出咗名鍾意飲酒嘅文人蘇東坡畀人貶咗去嶺南之後冇幾耐就寫咗嶺南第一本講釀酒嘅書－《東坡酒經》。喺 15 世紀嘅大明統治之下，嶺南嘅釀酒業開始全面咁發展，開咗好多酒行會館，好似係佛山酒行會館就出咗名因為水質好、米料夠所以出到好酒。到咗今日，嶺南已經出緊好多唔同嘅酒。嶺南米酒係嶺南嘅一種名產；廣東十大名酒亦都好有人氣，尤其係當中嘅玉冰燒個勢特別勁。而傳統上，嶺南喺婚禮同埋佛山嘅秋色祭亦都會用到嶺南釀嘅酒。
響 2014 年，佛山開咗間嶺南酒文化博物館嚟介紹嶺南嘅酒文化。
傳統節慶
粵人有好多傳統節慶。當中有啲係其他東方人都會慶祝嘅，例如係盂蘭節咁，就連日本人同好多東南亞族群都會慶祝。但係粵人好多時會有一啲獨有嘅習俗：好似係過年嗰陣行花市呢家嘢喺粵人以外嘅華人族群好少見。粵人又會特別睇重某啲節日，好似係佛誕咁：因為傳統粵人都係信佛多，所以佛誕會大搞，但係反而唔會點樣理孔聖誕。總括嚟講嘅話，嶺南嘅傳統節慶有：
唐式節慶
- 粵式過年傳統：
- 其他唐式節日：
地方節慶
- 廣州菊展（有分春展同秋展）
- 廣府廟會（廣州）
- 廣東歡樂節（廣州）
- 佛山秋色賽會（佛山）
- 賣身節（東莞）
- 羊城荷花節（番禺）
- 番禺水色（番禺）
- 風箏節（陽江）
- 長洲太平清醮（香港）
- 車公誕（香港）
- 香港許願節（香港）
- 飄色巡遊
- 南海神誕
- 天后誕
- 譚公誕
- 北帝誕
- 冼太誕
功夫
嶺南嘅人由中世紀後半橛開始就有創作好多打交技巧，但係嗰陣時啲門派好亂，分得唔清唔楚，要去到 18 至 19 世紀先至有清析嘅門派可言。嗰時嘅大清政府管唔掂個國家，搞到好似廣東廣西呢啲邊界地方好多賊仔同海盜喺度搞搞震。於是粵人為咗保護自己同埋屋企人，就開始興學打交。呢個潮流令到嶺南嗰頭開咗成柞功夫館，而且粵人重順手執咗吓佢哋啲打交技巧，將佢哋已經識嘅技術整理分類好－兩廣嘅南拳門派（指長江以南地區嘅功夫流派）就成咗形。嗰陣時粵人重出咗好多好似廣東十虎呢類嘅傳奇性嘅高手同英雄，當中以黃飛鴻最出位，好多港產片同電視劇都有拍佢嘅事跡[17]。
總體嚟講，嶺南嘅功夫派別主要特色係講究啲橋（指上身）法要多變同埋個馬（指下身）要扎得又穩又闊，會用大嗌嚟助威，好少可會跳躍或者起腳，冇乜華麗嘅大動作，講究實用－有務實嘅嶺南特色[18]。到咗今日，嶺南嘅功夫流派有[19]：
廣東南拳
廣西南拳
哲學思想
嶺南甚至重有自己嘅一套宋明理學流派。由 11 世紀開始，宋明理學就越嚟越多人研究，好快就連日本、韓國、同埋越南嘅儒學者都搞埋一份。呢種學問基本上係借咗儒家嗰套思想，再加啲佛教同道教嘅嘢嚟去將儒家思想重新諗做一啲包含咗人道主義同理性主義嘅新思想。喺 12 世紀嗰陣，崔與之（號菊坡）創立咗菊坡學派，令到嶺南開始有咗屬於自己嘅一套哲學思想體系。打後嗰幾百年，嶺南嘅哲學就一路有發展，出咗一班幾有料到嘅思想家。
嶺南學派
嶺南學派（粵拼：Ling5 naam4 hok6 paai3）可以講得上係嶺南哲學入面最有代表性嘅一個流派。佢係一班嶺南出身嘅文人響 15 世紀嗰陣開嘅一個宋明理學流派，佢嘅代表人物係廣東新會出身嘅哲學家陳獻章（外號叫白沙先生）。佢寫嘅哲學文家陣好詳細咁樣收錄咗喺《陳獻章集》入面。喺呢啲文入面，陳獻章表達咗佢嘅思想，佢主要係主張「自得」同「以心為主」。陳獻章係咁講：「子之所得者有如此，則天地之始，吾之始也，而吾之道無所增；天地之終，吾之終也，而吾之道無所損。天地之大，且不我逃，而我不增損，則舉天地間物既歸于我，而不足增損于我矣。」佢認為只要人一確立咗自己嘅主體性，就可以唔理外在嘅控制而同天地和諧共存，甚至乎係去控制返天地轉頭，而天地萬物亦都係要有人嘅主體性先至會有自己嘅價值同意義。呢種算係幾有個人主義味道嘅思想，而呢種傾向亦都反映到喺嶺南學派嘅其他方面－佢哋重主張人要獨立思考，叫人應該多啲去挑戰固有嘅諗法，反對人云亦云，好似係陳獻章又曾經咁樣講：「學貴知疑，小疑則小進，大疑則大進，疑者覺悟之機也。」意思係求學問最寶貴嘅嘢係要學識去質疑，越識得質疑就越會有進步。總體嚟講，呢個學派係借咗儒家嘅人本精神，但係又會好似道教咁樣睇重講人同自然之間嘅關係，甚至可以話係有啲畀西人嗰種睇重問問題嘅諗嘢方式影響咗。
甘泉學派
陳獻章嘅徒弟湛若水（外號湛甘泉）後嚟重攞佢師父嗰套思想去創立咗一個新嘅甘泉學派（粵拼：Gam1 cyun4 hok6 paai3）。湛若水佢喺唔少方面同意佢師父嘅諗法，但係覺得佢師父嘅某啲主張太似禪宗佛教（好似係陳獻章鍾意用靜坐嚟修養咁），而且佢對其他嘅學派（尤其係陽明學派）重有自己嘅一套批判。
其他學派
除咗呢柞宋明理學流派，嶺南亦都出咗東塾學派（粵拼：Dong1 suk6 hok6 paai3）同八桂學派（粵拼：Baat3 gwai3 hok6 paai3）等嘅思想流派。
宗教信仰
同其他東北亞族群好似嘅係，粵人傳統嚟講乜都會拜：佛教（主力係大乘佛教）、道教、好多派嘅基督教、回教、同埋好多自然崇拜喺呢一頭都有唔少嘅信徒。以一個東方地區嚟講，嶺南特別多經海路由西面傳入嚟嘅宗教－佛教、唔同派嘅基督教、同埋回教；咁亦都係反映咗粵人傳統上特別多同外面嘅世界交流。
大乘佛教
比起拜孔孟，粵人多數都係鍾意拜佛或者拜觀音多啲。呢樣嘢係沿襲咗大唐嘅文化－唐係中國史上最睇重佛教嘅朝代。唐三藏去印度學完佛之後返咗去大唐，將佢學到嘅嘢周圍教畀嗰時嘅漢人，啲漢人加咗啲自己嘅嘢落去，做出咗有漢文化風格嘅大乘佛教（粵拼：Daai6 sing4 fat6 gaau3）。大乘呢個詞有「普渡眾生」嘅意義，係主張修道者要識得有菩提慈悲心，為咗眾生著想而唔入涅槃住，改為留喺人世度教化其他生靈－而呢啲充滿慈悲心嘅人就係所謂嘅菩薩。大乘派嘅佛廟喺嶺南地區周圍都係，而且佛誕同埋觀音誕呢啲都係屬於喺粵文化入面都幾重大嘅節日。
道教
喺嶺南嘅主要宗教入面，得道教（粵拼：Dou6 gaau3）係經陸路由北面嘅中原地區傳入嚟嘅。道教思想喺度有唔少影響力，好似係拜城隍、拜土地公、拜華光大帝、或者係風水文化呀咁，都係由道教嗰度搞出嚟嘅。道教嘅主要思想喺公元前 500 幾年嗰陣喺中原嗰頭發跡，後嚟傳嗮去成個東北亞，喺日本、韓國、同埋越南都有一定嘅影響力。呢個教主張人要跟隨「道」去做修行，最後達到「天人合一」嘅境界。而所謂嘅「神仙」就係修行境界極之高嘅人，高到曉飛天遁地同埋有好多法力，而啲人拜佢哋就係為咗想要佢哋保佑。
喺呢方面，嶺南都有啲自己嘅風格，會拜一啲有本土特色嘅神：黃大仙多數係粵人先會拜嘅；而且粵人重好興去拜啲好似南海神洪聖同媽祖呢一類嘅海神－同內陸地區唔同，反映咗粵人傳統興經海路搞生意嘅文化。
.jpg)
其他教
除咗大乘佛教同埋道教呢類有東方色彩啲嘅教之外，基督教（粵拼：Gei1 duk1 gaau3）同埋回教（粵拼：Wui4 gaau3）喺嶺南都有一定數量嘅追隨者。喺 15 到 16 世紀嗰陣，嶺南係大明嘅主要對外港口，有唔少西歐嘅商人會喺呢一頭設置自己嘅基地，咁西歐嘅基督教教派（即係天主教同新教，但重有其他細啲嘅教派）會跟手傳埋入嚟一啲都唔奇。而喺再早啲嘅時期，嚟自阿拉伯同波斯嘅商人都有喺嶺南一帶度搞生意，佢哋嘅回教自然跟住佢哋一齊入埋嚟。最後，香港喺 18 到 19 世紀做英國殖民地嗰時，有唔少南亞嘅人去咗香港嗰度打工，令到佢哋嘅信仰－好似係印度教、錫克教、同拜火教呀咁－傳咗嚟。總括講句，嶺南喺宗教方面可以話係百花齊放。
次文化
冼夫人文化
冼夫人（粵拼：Sin2 fu1 jan4）係喺嶺南民間好多人識嘅歷史人物，重畀人嗌做「嶺南聖母」。佢本名叫亞英，係公元 6 世紀嗰陣嶺南嘅百越族當中一個有本事嘅領袖同軍事家。佢喺隋朝時期幫中原嘅皇朝手打冧咗嗰時喺嶺南度割據一方嘅陳朝，後嚟又平定咗幾場百越族人嘅作反，最後幫中原皇朝手成功咁控制住嶺南地區同埋開始咗呢一頭嘅漢化過程，間接係幫咗嶺南進化成今日嘅樣。現代嘅嶺南民間間唔中都會搞活動嚟去紀念冼夫人嘅功績，重起咗啲叫冼太廟嘅建築物－直頭有啲當咗冼夫人係神咁拜。
袁崇煥文化
袁崇煥（粵拼：Jyun4 sung4 wun6；1584 年6月6號 - 1630 年9月22號）係嶺南一個好重要嘅歷史人物。佢喺東莞出世，係大明末期一個好重要嘅反清將領。佢喺 1619 年嗰時中咗進士，後嚟調去兵部守山海關同遼東，創咗好多戰績同幫手搞咗好多軍事工程。但係喺崇禎手下畀人屈佢話佢係內鬼，搞到畀崇禎判佢凌遲處死。雖然係咁，佢響好多粵人心目中都係一個英雄人物。嶺南地區周圍都有佢嘅紀念館，而佢嗰句金句「掉哪媽，頂硬上！」（注：呢句係廣東話粗口）。基本上喺嶺南冇人唔識。後嚟佢句嘢喺 2010 年 7 月畀人鑿走嗰單嘢重觸發咗廣州撐粵語行動。
粵商
粵商（粵拼：Jyut6 soeng1）係指一啲由粵人組成嘅商幫。響歷史上近呢二千年嚟，嶺南（尤其是係廣州嗰頭）喺好幾個朝代都係做中原皇朝嘅對外港口[20]，令到粵人有咗一種好強嘅商業文化，出咗好似廣州十三行呢類出名嘅商幫，而且重有一套自己嘅行商之道[21]：粵商出咗名會當關公係財神咁嚟拜，喺行商手法上會講實用，做生意嗰陣會避開政治嘢，注重結果同實利多過虛名，低調唔鍾意出風頭，硬係驚畀人打劫所以會講「財不可以露眼」，而且知足又自強。到咗今日，粵人重係傳承緊粵商文化，好似係廣州、香港、佛山、同深圳呢啲嶺南主要城市都係大商埠，會搞好多金融同工業生意：好似係香港咁，直到 2016 年，香港嘅全球金融中心指数（Global Financial Centres Index，簡稱 GFCI）去到成 748 －係全世界第四，只係低過倫敦同紐約市少少[22]。
象徵物
-
春天盛開緊嘅木棉花 -
迫滿嗮三板嘅廣州港口 -
盛開緊嘅洋紫荊
_flowers_in_Kolkata_W_IMG_4116.jpg)
.jpg)
木棉花
木棉花（粵拼：Muk6 min4 faa1）好多時都畀人覺得係最代表到嶺南嘅花。嶺南嘅木棉文化有得追溯到去百越時期：據講公元前 200 年嗰時，南越國嘅國王趙陀曾經送咗棵木棉樹畀統治緊中原嘅漢皇朝嚟表示敬意－即係話喺嗰時嶺南嘅人已經有用緊木棉嚟代表自己鄉下。到咗今日，木棉已經係粵文化入面好重要嘅象徵物，成日都喺粵人作嘅詩歌或者散文度出現，好似係《南海潮》呢首民歌就用咗「紅棉」嚟代表粵文化。亦都有粵人攞木棉樹嚟同英雄比較，話佢樹幹又大又粗，又成日生得高過嗮周圍啲樹，重就咁幫佢改咗個花名叫「英雄樹」。
木棉家陣已經做咗嶺南文化大城廣州嘅市花。
喺西化嘅香港，木棉文化都有啲影響力。好出名嘅粵語流行歌手羅文有作咗首叫《紅棉》嘅歌，專係講木棉嘅。除咗咁，喺香港公園嘅紅棉路婚姻註冊處係香港人嘅結婚熱門地點。
三板
三板（粵拼：Saam1 ban2），又叫做舢板，係南中國海沿岸度成日都會見到嘅一種木造嘅平底艇仔。呢種艇仔粵人、福佬人、越南人、同埋好多東南亞民族都會用。佢哋通常係三米半到四米左右，好多時會加個篷，重住得人。好多漁民會住喺三板度方便佢哋做嘢，令到好似係廣州同香港呢啲嶺南嘅沿海城市成日都會有一大柞三板泊嗮喺個港口度，係好有本地特色嘅景象。三板喺粵人作嘅歌或者拍嘅戲度耐唔耐就會蒲頭，令到好多人覺得佢係嶺南文化嘅象徵物之一。
《南海潮》呢首民歌入面都有提咗「舢板」。
洋紫荊
洋紫荊（粵拼：Joeng4 zi2 ging1）可以話係香港嘅象徵。佢喺 1880 年嗰陣畀一個神父發現，後嚟喺 1908 年畀學界判定係新嘅品種，喺 1965 年正式做埋香港嘅市花。而喺 1997 年主權移交之後，洋紫荊圖案重出現咗喺香港嘅特區區旗嗰度。始終香港係出咗好大柞好似係戲、電視劇、同流行歌呢類嘅文化產物嚟宣傳粵文化，令到香港畀好多粵人覺得佢係現代粵文化嘅代表。因為咁，洋紫荊有時會畀人覺得同粵文化好有關係，例如係《南海潮》呢首歌度都有提咗「紫荊」嚟去代表粵人同埋粵文化。
香港嘅金紫荊廣場有座好大嘅金色洋紫荊雕像，係香港嘅地標之一。
睇埋
嶺南風俗
相關文化
其他
攷
- ^ Loewe, Michael (1987). "The Former Han Dynasty". The Cambridge History of China, Volume 1: The Ch'in and Han Empires, 221 B.C.–A.D. 220. Cambridge: Cambridge University Press.
- ^ 中國評論學術出版社. hk.crntt.com.
- ^ 岭南园林的营造手法与艺术特色_建筑规划_中国百科网. www.chinabaike.com.
- ^ 南園蓮池/志蓮淨苑 仿照唐代藝術的古式園林與佛教廟宇～
- ^ The Art of Lingnan School, 嶺南畫派的繪畫藝術. www.lingnanart.com.
- ^ Croizier, R. C. (1988). Art and Revolution in Modern China: the Lingnan (Cantonese) school of painting, 1906-1951 (Vol. 29). Univ of California Press.
- ^ 中國評論新聞：嶺南書法與書法家. hk.crntt.com.
- ^ chinanews. 西汉南越王墓玉器（图）——中新网. www.chinanews.com.
- ^ 『锦绣岭南』四大名绣之粤绣艺术展
- ^ 香港僅存廣彩瓷廠 首度展覽經典瓷畫 - Scarcity. 2016-09-29.
- ^ 佛山剪纸专题网站.
- ^ 中國評論新聞：嶺南民歌知多少？. hk.crntt.com.
- ^ 談廣東方言的格律詩. www.cantoneseculture.com.
- ^ 嬉笑集 - 粵典文庫.
- ^ 香港文學資料庫. hklitpub.lib.cuhk.edu.hk.
- ^ 香港中國語文學會. www.huayuqiao.org.
- ^ 武俠小說《武壇二虎 》自序裡的廣東十虎
- ^ 岭南南派武术技术特征的文化研究
- ^ Sensei/Renshi Nathan Chlumsky. Inside Kungfu: Chinese Martial Arts Encyclopedia. Lulu.com. 2015. ISBN 13-2911-942-8.
- ^ 千年粵商
- ^ Cheng, Y. H., & Huang, P. Y. (2008). A Review of the Research on the Culture of Cantonese Merchants [J]. Journal of Guangdong University of Business Studies, 3, 013.
- ^ The Global Financial Centres Index 19. Long Finance. March 2016.
出面網頁
[[Category:嶺南文化| ]]